Qyrǵyzstanda Parlament spıkeri men el Premer-Mınıstri saılandy
BІShKEK. 18 jeltoqsan. QazAqparat /Arnur Rahymbekov/ - Juma kúni keshke Qyrǵyzstan Jogorký Keneshiniń ekinshi májilisi aıaqtalyp, onyń qorytyndysy boıynsha depýtattar Parlament spıkerin jáne el Premer-Mınıstrin saılady.
Qyrǵyzstannyń Sotsıal-demokratııalyq partııasy, «Atajurt» jáne «Respýblıka» partııalarynan qurylǵan koalıtsııa bul laýazymdarǵa óz kandıdattaryn usyndy. Sonymen, Jogorký Kenesh spıkeri bolyp «Atajurt» partııasynyń múshesi Ahmatbek Keldibekov saılandy. 44 jastaǵy saıasatker uzaq ýaqyt boıy Qyrǵyzstannyń qarjy júıesinde laýazymdy qyzmetter atqarǵan. Jasyryn ótken daýys berýge barlyǵy 116 depýtat qatysty, jańa spıkerdi qoldap - 101 depýtat daýys berse, 14 depýtat - qarsy boldy.
Úzilisten keıin qyrǵyzstandyq parlamentshiler Premerlikke usynylǵan Almazbek Atambaevtyń kandıdatýrasyn jáne onyń ekonomıkalyq baǵdarlamasyn talqylady.
Keden odaǵyna qosylýdy, Reseı jáne Qazaqstanmen qarym-qatynasty damytýdy eldiń syrtqy ekonomıkalyq basymdyqtaryna jatqyzyp otyrǵan A.Atambaevty qoldap 92 depýtat daýys berdi, 88 depýtat úkimettiń jańa quramyna qoldaý bildirdi. Jańadan saılanǵan spıker A.Keldibekov depýtattardy zańdy úkimettiń jasaqtalýymen quttyqtady.
Keshirek Jogorký Keneshke el Prezıdenti Roza Otynbaeva hanym kelip, Ahmatbek Keldibekovty spıkerlikke saılanýymen, Almazbek Atambaevty Premer-Mınıstr bolýymen quttyqtady. «Respýblıka» fraktsııasynyń jetekshisi Ómirbek Babanovqa koalıtsııa qurǵany jáne úkimetti bekitkeni úshin alǵys bildirdi.
Qyrǵyzstan saıası qurylystyń jańa kezeńine aıaq basyp otyrǵanyn atap kórsetken R.Otynbaeva, eldi júıelik ózgerister kútip turǵanyn aıtty.
