Qyrǵyzstanda parlament saılaýy bastaldy (FOTO)
BІShKEK. QazAqparat - Búgin 08:00-de Qyrǵyzstanda Jogorký Kenesh depýtattaryn parlamenttik saılaý boıynsha saılaý ýchaskeleri ashyldy.
Bishkektegi №70 mektep-gımnazııasynda №1216 saılaý ýchaskesiniń jumysy ashylǵan. «QazAqparat» tilshisine bergen suhbatynda saılaý komıssııasynyń tóraıymy Natalıa Belovolova daýys berý protsedýrasy týraly baıandap berdi.
«Bizdiń ýchaskemizde 1615 saılaýshy tirkelgen. Qazirgi kezde bizde 42 baıqaýshy tirkeldi. Daýys berý tańerteńgi saǵat 8-de bastaldy. Arnaıy jáshikter qoıylǵan, avtomatty túrde esepteıtin quraldar men operatorlar jumys isteýde. Barlyq málimetter birden monıtorlarǵa shyǵyp otyrady», - dep habarlady N.Belovolova.
Daýys berý protsedýrasynda daýys berýshiniń saýsaq izderin skanerden ótkizilip, sol ýaqytta onyń fotosýreti monıtorǵa shyǵarylyp, rettik nómiri belgilenedi. Memlekettik tirkeý qyzmetiniń ókili bıometrlik málimetterdiń negizinde chek beredi. Ýchaskelik saılaý komıssııasynyń músheleri bul chek arqyly jeke málimetterdi saılaý tizimderimen salystyryp, daýys berý úshin arnaıy bıýlleten usynady. Odan keıin saılaýshy daýys berýge arnalǵan arnaıy kabınkaǵa baryp, sońǵy kezeńde resimdelgen bıýlletendi arnaıy jáshiktiń esepteý quralyna salady.
«Elektrondyq jáshik bıýlletenderdiń sanyn ǵana tirkeıdi, al keshke daýys berý aıaqtalǵan soń kimniń kimge daýys bergeni esepteledi. Qazirdiń ózinde qansha adamnyń daýys bergenin kórýge bolady. Bul ýchaskede tirkelýi bar jáne bizdiń tizimderimizge engizilgen saılaýshylar ǵana daýys bere alady. Bógde adamdar olaı isteı almaıdy», - dep sendirdi komıssııanyń tóraıymy.
