Qyrǵyzstanda pandemııanyń úshinshi tolqyny bastalyp, bılik qaýipsizdik sharalaryn kúsheıtti
Buǵan deıin boljamdalǵandaı, maýsym byltyrǵy jylǵydaı el úshin kúrdeli synaqqa aınalýy múmkin. Statıstıka boıynsha, kún saıyn aýrýǵa shaldyǵýdyń jańa oqıǵalarynyń sany tek ósip keledi (kúnine 1000 oqıǵaǵa jaqyndap keledi). Vaktsınalaý júrgizilgenimen, preparattar ázirge bárine birdeı jetip jatqan joq. Bul týraly QazAqparat Qyrǵyzstannyń KABAR aqparat agenttigine silteme jasap habarlaıdy.
Osyǵan baılanysty, jaqynda el bıligi Qyrǵyzstanda koronavırýstyń úshinshgi tolqyny bastalyp ketkenin málimdedi. Túrli qaýipsizdik sharalary kúsheıtilip, bılik halyqty densaýlyǵyna muqııat qaraýǵa, qoǵamdyq oryndarda maska taǵýǵa, qoldy jıi jýyp turýǵa úndep otyr.
Bishkekte budan da qatań sharalar engizý josparlanýda. Osylaısha, 17 maýsymnan bastap el astanasynda kóńil kóterý mekemeleriniń jumysyna qatysy bar birqatar shekteýler engiziletin bolady.
«Koronavırýs ınfektsııasyna shaldyǵý oqıǵalarynyń kún saıyn ósimine baılanysty 2021 jyldyń 17 maýsymynan bastap oıyn-saıyq mekemeleri (túngi klýbtar, meıramhanalar, qoǵamdyq tamaqtaný oryndary, dámhana, karaoke, barlar), sonyń ishinde saýda, oıyn-saýyq ortalyqtarynda ornalasqan kóńil kóterý oryndarynyń jumys kestesine shekteý engizý sheshimi qabyldanǵan. Endi atalǵan oryndar túngi saǵat 23:00-den bastap tańǵy saǵat 7:00-ge deıin jumys isteıtin bolady», - delingen Bishkek merııasynyń málimdemesinde.
Ákimshilińten atap ótkendeı, bul sheshim áleýmettik blok jónindegi vıtse-mer Vıktorııa Mozgachevanyń tóraǵalyǵymen ótken qalalyq tótenshe epıdemııaǵa jáne epızootııaǵa qarsy komıssııanyń otyrysy barysynda qabyldanǵan.
«Komıssııa músheleri Bishkek qalasyndaǵy epıdemıologııalyq jaǵdaı men koronavırýs ınfektsııasynyń odan ary taralýyn boldyrmaý boıynsha qabyldanyp otyrǵan sharalardy talqyǵa salǵan. Onyń qorytyndysy boıysha shekteý engizý týraly tıisti sheshim qabyldandy», - dep atap ótti qalalyq merııadan.
Budan bólek, qoǵamdyq kólik ishinde sanıtarlyq normalardyń saqtalýyn qadaǵalaý boıynsha reıdter júrgiziledi. Bishkek vıtse-meri el astanasyndaǵy aıaldamalar men qoǵamdyq kólikterde maskalardy tegin taratý máselesi qarastyrylyp jatqanyn atap ótti.
