Qyrǵyzstanda ótetin kóshpendiler oıyndarynda 600 medal sarapqa salynady
BІShKEK. QazAqparat - Qyrǵyzstanda ótetin kóshpendilerdiń III dúnıejúzilik oıyndaryna 200-ge jýyq qazaqstandyq sportshy qatysady, dep habarlaıdy QazAqparat 24.kz silteme jasap.
Bizdiń delegatsııa eń aýqymdy quramalardyń qatarynda. Búginde kórshiles elde halyqaralyq jarysqa arnalǵan daıyndyq jumystarynyń sońǵy kezeńi júrgizilip jatyr. Bishkekten Dúnıejúzilik kóshpendiler oıyndary ótetin Cholpan Ata qalasyna deıin aparatyn bir ǵana jol bar. Onda qazir qurylys jumystary aıaqtalýǵa jaqyn. Endi bul jol tórt jolaqty úlken avtomagıstralǵa aınaldy.
"Joldyń ekinshi qabatyn tósep úlgermeımiz. Óıtkeni bul - úlken joba. Joldyń uzyndyǵy - 104 shaqyrym",-deıdi avtomobıl joldary departamentiniń dırektory Shabdanbek Imanqulov.
Kóshpendiler oıyndary ótetin basty nysan - Cholpan Ata ıppodromy. Keshen osydan eki jyl buryn qaıta jóndeýden ótip, qyrǵyz halqynyń ulttyq naqyshyna saı jasaqtalǵan.
"Kok-Borý alańyndaǵy qumnyń bir qabatyn alyp tastaýdy josparlap otyrmyz. Sebebi attar shapqan kezde birqalypty mánerdi joǵaltyp alady. Sol sebepti jarys bastalǵansha alańdy daıyndap qoımaqpyz",-deıdi ıppodrom dırektory Elaman Mamytov.
Dúbirli dodaǵa qatysý úshin 53 elden ótinish kelip túsken. Sportshylardyń basym bóligi Reseı jáne Qazaqstannan keledi. Jarysta barlyǵy 600 medal sarapqa salynady. Jalpy júlde qory 260 mıllıon somdy, ıaǵnı 400 myń dollardy quraıdy. Sporttyq shara aıasynda kóshpendi halyqtardyń tarıhy, mádenıeti jáne salt-dástúrin kórsetý josparlanyp otyr.
Foto: ria.ru
