Qyrǵyzstanda Osh áýejaıy jańa jerge kóshiriledi

BІShKEK. QazAqparat - Qyrǵyzstannyń ońtústik astanasynyń usynylyp otyrǵan jańa bas josparynda Osh áýejaıyn jańa orynǵa kóshirý qarastyrylǵan. Bul týraly Osh qalasynyń bas jospary jobasynyń avtory Januzaq Kólbatyrov málim etti.

Mamannyń aıtýynsha, Osh qalasynyń jańa bas josparyn ázirleý qajettiligi 1999 jylǵy bas josparynyń eskirýimen baılanysty.

«1999 jylǵy qalanyń bas josparynda jańadan salynǵan kóptegen ǵımarattar, mektepter, áleýmettik nysandar men basqa ımarattar negizgi bas josparǵa engizilmegen», - dedi ol. J.Kólbatyrov atap ótkendeı, Osh qalasynyń jańa bas jospary 2015 jyldyń sońynda daıyn bolady. Jańa bas jospar jobasynda Osh áýejaıyn jańa orynǵa kóshirý de qarastyrylǵan. Osh halyqaralyq áýejaıy Ferǵana jazyǵyndaǵy iri áýe keńistiginiń biri bolyp tabylady. Munda Qyrǵyzstannyń ońtústik óńirlerinen áýemen tasymaldaý qyzmeti qamtamasyz etiledi. Ol Bishkek qalasynan 389 shaqyrym, al Tashkentten 322 shaqyrym qashyqtyqta ornalasqan. Reseı, Túrkııa, Qytaı, BAÁ áýe reısterin qabyldaıdy.