Qyrǵyzstanda lombardtar balany kepilzat retinde alýda
ASTANA. QazAqparat - Qyrǵyzstanda lombardtar paıyzdyq mólsherlemesin 180 paıyzǵa deıin jetkizip, kepilge balalardy da alyp jatyr. Bul týraly juma kúni ótken baspasóz máslıhatynda osy eldegi qaryzgerler komıtetiniń tóraıymy Dınara Nazarqulova málim etti.
Onyń sózine qaraǵanda, búginde lombardtardyń jumysyn Ulttyq bank pen Qarjy mınıstrligi qadaǵalap otyrǵan joq. Zańnamaǵa sáıkes, lombardtar kepilge altyn men orgtehnıkany ǵana alýǵa quqyly. Shyn máninde, kepildikke qujattar, jyljymaly jáne jyljymaıtyn múlik alynýda.
«Ońtústikte lombardtan tipti shekten shyǵyp otyr, olar kepilzattyń ornyna balalardy alyp, ata-analary qaryzdaryn qaıtarǵansha jetkinshekterdi ózderine qaldyrady eken», - dep atap ótti D. Nazarqulova.
«Lombardtarda ózderiniń notarıýstary men memlekettik tirkeý qyzmetinde adamdary bar . Olar erli-zaıyptylardyń biriniń kelisiminsiz nemese úı ıesiniń ruqsatynsyz jyldam túrde úıler men avtokólikterdi qaıta rásimdeı alady. Bular 7-den 15 myń somǵa deıingi aralyqta satyp alatyn patentterdiń negizinde mıllıardtaǵan qarjyny aınaldyryp otyr», - dep naqtylady ol.
Qaryzgerler komıteti ókili atap ótkendeı, qazirgi kezde lombardtardyń paıyzdyq mólsherlemesi jyldyq 160-180 paıyzdy quraıdy, dep jazady kyrtag.kg.
«Ósimqorlyq týraly zań múldem jumys istemeıdi. Dollarmen nesıe alǵandardyń barlyǵy amerıkalyq valıýta baǵamynyń ósýine baılanysty qazirgi kezde negizgi somany eńsere almaı otyr. Sondyqtan da biz lombardtar shaǵyn nesıelik kompanııalar mártebesine ótip, sáıkesinshe salyq tóleýi úshin Ulttyq bankke tıisti úndeý jasaımyz», - dep usyndy D. Nazarqulova.
«Men jaqynda Ystyqkól oblysy boıynsha saparlap, lombardtardyń jumysymen tanystym. Olar ábden shekten shyǵyp ketken. Kepilzat retinde olarda úılerdiń qujattary, avtokólikter, tólqujattar jatyr. Osy oraıda qanshama adamnyń taǵdyry buzylǵanyn aıtý qıyn. Mysaly, Barskoon aýylynda anasy alǵan qaryzyn ótemegeni úshin ósim alýshy onyń qyzyn zorlap, qorlyq kórsetken», - dep túıdi qaryzgerler komıtetiniń tóraıymy.
