Qyrǵyzstanda laı kóshkini 10 úıdi basyp qaldy
ASTANA. QazAqparat - Keshe, 30 sáýir kúni Úzgen aýdany Jalpak-Tash aýyldyq okrýginde laı kóshkini júrip, 10 úıdi basyp qaldy. Bul týraly 24.kg Qyrǵyzstan TJM silteme berip habarlady.
Mekeme derekterine sáıkes, eldi mekende 61 úı ornalasqan, onyń 10 úıi laı astynda qaldy. Taǵy tórt áleýmettik nysan - mektep, balabaqsha, meshit jáne feldsherlik-akýsherlik pýnkt qaýip aldynda tur. Buǵan deıin apattyń bolýy týraly barlyq turǵyndarǵa eskertilip, olardy qaýipsiz jerge kóshirdi jáne 15 shatyr tigildi.
Eske sala ketsek, 2017 jyldyń 29 sáýirinde Osh oblysy, Ózgen aýdany, Zerger aýyldyq okrýgynyń Aıý aýylynda adam shyǵyna ákep soqqan laı kóshkini júrdi. 30 sáýir Qyrǵyz Respýblıkasyndaǵy Aza tutý kúni bolyp jarııalandy. Qazaqstan Prezıdenti Nursultan Nazarbaev tabıǵat apatyna baılanysty Qyrǵyzstan prezıdentine kóńil aıtty.
