Qyrǵyzstanda lańkestik áreketke daıynalyp jatqandar toby ustaldy
BІShKEK. 29 qarasha. QazAqparat /Arnur Rahymbekov/ - Osh qalasynda Bishkek pen eldiń ońtústiginde lańkestik áreket jasaýǵa daıyndalyp jatqan Qyrǵyzstan azamattary qolǵa tústi.
Bul týraly 29 qarasha kúni Qyrǵyzstannyń ishki ister mınıstri Zarlybek Rysalıev málim etti.
Jergilikti BAQ málimetterine súıensek, bul top qyrǵyz, ózbek ulttarynyń ókilderinen jáne bir orys ultty azamattan turatyn ulttyq-separatıstik adamdar uıymy.
Qazirgi tańda 9 adam qolǵa túsken, tergeý amaldary qolǵa túsken úsh adamnyń jaýaptary boıynsha júrgizilýde. Olardy ustaý barasynda jarylǵysh zattar, eki Makarov tapanshasy, bir jaraqattaý tapanshasy, esirtki men 69 000 som aqsha tárkilengen.
Ustalǵan adamdarǵa qatysty Qyrǵyzstan Konstıtýtsııasynyń «Lańkestik áreket jasaýǵa daıyndalý» baby boıynsha qylmystyq is qozǵaldy. Tergeýdi vedomstvoaralyq top júrgizip jatyr.
«Olarmen jeke sóılesken kezimde lańkestik uıymdarmen tyǵyz baılanysyn baıqamadym», - dedi ІІM mınıstri.
Mınıstr qazirgi tańda osy topqa tapsyrys berýshiler, uıymdastyrýshylar men qarjylandyrý kózi anyqtalyp jatqanyn, biraq tergeý múddesine oraı olardyń aty jarııalanbaıdy degen aqparatty qosa aıtty.
Aldyn ala boljam boıynsha, lańkestik áreketter Bishkek jáne Osh qalalaryń saýda núktelerinde, sondaı-aq qoǵamdyq-saıası turaqsyzdyq ornatý úshin adamdar kóp jınalatyn oryndarda jasalmaqshy bolǵan.
