Qyrǵyzstanda qulaǵan ushaqtyń «qara jáshigi» tabyldy
BІShKEK. QazAqparat - Qyrǵyzstanda qulaǵan ushaqtyń «qara jáshigi» tabyldy, dep habarlaıdy QazAqparattyń Bishkektegi menshikti tilshisi.
«Apatqa ushyraǵan Boıng-747-400 ushaǵynyń «qara jáshigi» qırandylardyń astynan alyndy. Qazirgi ýaqytta borttaǵy ózdiginen jazatyn qural áýe apatynyń sebepterin anyqtaý maqsatynda qurylǵan shtabqa jetkizildi», - delingen Qyrǵyzstan TJM-niń baspasóz qyzmeti.
Eske salsaq, 16 qańtarda saǵat tańǵy 7.31-de Bishkektiń Dacha-Sýý aýylynda áýejaıǵa jaqyn jerde Gonkongten Túrkııaǵa bet alǵan júk ushaǵy qulady. Avıalaıner «Manas» áýejaıynan maı quıýdy josparlaǵan. Apat saldarynan 32 adam qaza tapqan. Qyrǵyzstan vıtse-premer-mınıstri Mýhammetqalyı Abýlgazıevtyń basshylyǵymen arnaıy shtab quryldy. Qyrǵyzstanda erteń aza tutý kúni bolyp jarııalandy.
