Qyrǵyzstanda koronavırýs juqtyrǵandar sany 200-den asty
BІShKEK. KABAR – QazAqparat - Qyrǵyzstanda 6 sáýir kúngi saǵat 10:00-degi jaǵdaı boıynsha COVID-19 juqtyrǵan taǵy 69 oqıǵa tirkeldi. Bul týraly brıfıngte búgin eldiń Densaýlyq saqtaý mınıstri Sabırjan Ábdikárimov málim etti, dep habarlaıdy QazAqparat Kabar agenttigine silteme jasap.
Onyń aıtýynsha, Qyrǵyzstanda COVID-19 vırýsyn juqtyrǵandar sany 216 adamǵa jetken.
«Rastalǵan jańa jaǵdaılardyń barlyǵy observatsııada bolǵandardan tirkeldi. Eldegi epıdemıologııalyq jaǵdaı órship tur», – dedi ol.
S.Ábdikárimovtiń málimetinshe, 6 sáýirde 10 adam emdelip shyqqan.
«Búgin taǵy 23 adamdy aýrýhanadan shyǵarýdy josparlap otyrmyz. Olardyń testi teris nátıje kórsetti», – dep habarlady S.Ábdikárimov.
Sondaı-aq mınıstr keshe Osh oblysynda COVID-19 vırýsynan taǵy eki adamnyń kóz jumǵanyn málimdedi.
Elde koronavırýstan qaıtys bolǵandardyń jalpy sany - 4.
