Qyrǵyzstanda kontrrevolıýtsııaǵa áreket jasaldy: bakıevtikter oblystyq ákimshilikti basyp aldy
ASTANA. Mamyrdyń 13-i. QazAqparat - Qyrǵyzstandaǵy jaǵdaı qaıta ýshyǵyp otyr. Taǵynan taıdyrylǵan Qurmanbek Bakıevtiń jaqtaýshylary búgin Osh qalasyndaǵy oblystyq ákimshilik ǵımaratyn basyp aldy,
dep habarlaıdy RBK agenttigi.
RBK agenttigine derek kózdiń habarlaýynsha, Osh qalasynda búgin eki mıtıng bastaldy, birinshisi - respýblıkanyń jańa bıligin qoldaýshylardyń, ekinshisi - olarǵa qarsylardyń jıyny boldy. Nátıjesinde ýaqytsha úkimetti jaqtaýshylar men olardyń qarsylastarynyń arasynda kishigirim qaqtyǵys oryn alyp, odan keıin bakıevshiler Osh oblystyq ákimshiliginiń ǵımaratyna basyp kiredi.
Derek kózdiń aıtýynsha, olar burynǵy ókimetti qaıtarýdy talap etip, jaqynda ǵana halyqqa tanystyrylǵan respýblıka konstıtýtsııasynyń jańa nusqasyna narazylyq bildirýde. Roza Otynbaeva bastaǵan oppozıtsııany bılikke alyp kelgen sáýir aıyndaǵy revolıýtsııa da Talastaǵy, odan keıin Naryn jáne Shý oblystaryndaǵy oblystyq ákimshilikterdi basyp alýdan bastalǵan bolatyn.
Esterińizge sala keteıik, Belarýs elinde saıası pana alǵan Qyrǵyzstannyń burynǵy prezıdenti Qurmanbek Bakıev, elge prezıdent retinde oralý nıeti joq ekenin málim etken bolatyn. Al Qyrǵyzstannyń ýaqytsha úkimeti bolsa, Belarýs elinen Q.Bakıevti ekstradıtsııalaýdy talap etýde.
