Qyrǵyzstanda Konstıtýtsııa boıynsha referendýmnyń qorytyndysy jarııalandy
BІShKEK. QazAqparat – Búgin Qyrǵyzstannyń Ortalyq saılaý komıssııasy bıylǵy 11 sáýirde ótken Konstıtýtsııa boıynsha referendýmnyń resmı qorytyndysyn shyǵardy, dep habarlaıdy QazAqparat.
Qyrǵyzstannyń «Kabar» agenttiginiń habarlaýynsha, referendýmǵa 1 mln 322 myń 124 azamat qatysty, 36,66%-dy qurady. Jańa Konstıtýtsııaǵa 79,3% «kelisti», 13,72% «qarsy» daýys berdi.
Jańa Konstıtýtsııany qabyldaý jónindegi referendým prezıdenttik basqarý nysanyn bekitýdi kózdeıdi.
Qyrǵyzstan prezıdenti buǵan deıin 1 shildeden bastap Qyrǵyzstan jańa Konstıtýtsııa men jańa zańdar boıynsha ómir súretinin habarlaǵan bolatyn. Sondaı-aq zańdardyń eki aı ishinde qabyldanatynyn aıtty. Qyrǵyzstan Konstıtýtsııasynyń jańa jobasynda prezıdenttik ókilettikti kúsheıtý kózdeledi.
Sarapshylar atap ótkendeı, el Prezıdenti birqatar mańyzdy zańdarǵa bastamashy bolady. Jobaǵa sáıkes Prezıdenttik qurylymdy anyqtaýǵa, sondaı-aq Mınıstrler kabınetiniń quramyn taǵaıyndaýǵa quqyǵy bolady.
Óz kezeginde Mınıstrler kabıneti prezıdent aldynda jaýapty bolady. Sondaı-aq Qyrǵyzstan sarapshylarynyń aıtýynsha, endi Memleket basshysy óz sheshimderi úshin jaýapty bolady. Budan bólek, endi jańa túzetýler boıynsha prezıdenttiń jaýapkershiligi belgilenip qana qoımaı, depýtattar sanyn azaıtý jónindegi normalar engiziledi. Ózgerister eldiń sot bıligine de qatysty bolady.
Aqpan aıynda S.Japarov «Qyrǵyz Respýblıkasynyń Konstıtýtsııasy týraly» zań jobasyn ótkizý týraly Jarlyqqa qol qoıdy. 2021 jylǵy 12 naýryzda Qyrǵyzstan Prezıdenti Sadyr Japarov «Qyrǵyz Respýblıkasynyń Konstıtýtsııasy týraly» zań jobasy boıynsha referendým (búkilhalyqtyq daýys berý) taǵaıyndaý týraly» zańǵa qol qoıdy.
Aıta ketý kerek, qoldanystaǵy Konstıtýtsııaǵa sáıkes el azamattary prezıdentin 6 jylǵa saılaıdy.
Esterińizge sala keteıik, 11 sáýirde Qyrǵyzstanda saǵat 20:00-de jergilikti keńesterge saılaý jáne jańa Konstıtýtsııa jobasy boıynsha referendým ótti.
