Qyrǵyzstanda qolma-qol dollardy elden shyǵarýǵa shekteý engizildi

BІShKEK. QazAqparat – Qyrǵyzstanda qolma-qol shetel valıýtasyn áketýge ýaqytsha tyıym salyndy. Tıisti qaýlyǵa Qyrǵyzstan Respýblıkasynyń Mınıstrler kabıneti qol qoıdy, dep habarlaıdy QazAqparat tilshisi mınıstrler kabınetiniń baspasóz qyzmetine silteme jasap.

Bul sheshim qarjylyq-ekonomıkalyq qaýipsizdikti qamtamasyz etý, ishki valıýta naryǵyndaǵy jaǵdaıdy turaqtandyrý, Qyrǵyzstan Respýblıkasynyń ulttyq múddelerin qorǵaý maqsatynda qabyldandy.

Qujatqa sáıkes, rezıdent emesterge jáne shetel azamattaryna 5 myń AQSh dollarynan asatyn shetel valıýtasyn, Qyrǵyzstan azamattary men rezıdentterine 10 myń dollardan astam somaǵa shetel valıýtasyn shyǵarýǵa ýaqytsha tyıym salynady.
Qyrǵyzstan Respýblıkasynyń azamattary men rezıdentterinen 10 myń AQSh dollarynan asatyn qolma-qol aqshany áketkeni úshin belgilengen lımıtten asatyn somanyń 10% kóleminde tólem alynady.
Eldiń shekara jáne memlekettik keden qyzmetterine qolma-qol AQSh dollaryn áketýge jol bermeý boıynsha qajetti sharalar qabyldaý tapsyryldy.
Avtory: Gúlmıra Ábdirahmanova