Qyrǵyzstanda kólikti mindetti saqtandyrý qujaty joq azamattarǵa aıyppul salynady
Tıisti qaýlyny Qyrǵyzstan Respýblıkasynyń Mınıstrler kabıneti qabyldady, dep habarlaıdy QazAqparat tilshisi.
Qyrǵyzstan Respýblıkasynyń «Avtokólik quraldary ıeleriniń azamattyq-quqyqtyq jaýapkershiligin mindetti saqtandyrý týraly» Zańy 2015 jyly qabyldanyp, ony engizý birneshe ret keıinge shegerildi. 2022 jyldyń jeltoqsanynda ony tolyq iske asyrý úshin sońǵy zańǵa táýeldi aktilerge qol qoıylǵan.
OSAGO kelisimi boıynsha saqtandyrýdyń eń tómengi quny jylyna 1 680 som (shamamen 19,6 dollar), eń joǵary baǵasy – 2 100 som (24,5 dollar), al ol joq bolǵany úshin aıyppul 3 000 somdy (35 dollar) quraıdy. Mindetti saqtandyrý quny júrgizýshiniń tájirıbesi, qozǵaltqysh kólemi jáne tehnıkalyq tekserýdiń bolýyna baılanysty.
Eger jol-kólik oqıǵasyna kináli adamnyń OSAGO polısi bolsa, saqtandyrý uıymy zardap shekken tarapqa keltirilgen zııandy óteıdi.
Kólik quraldary ıeleriniń azamattyq-quqyqtyq jaýapkershiligin mindetti saqtandyrý sharty boıynsha eń tómengi saqtandyrý somasy men jaýapkershilik lımıti bekitildi, olar:
- árbir jábirlenýshiniń ómirine nemese densaýlyǵyna zııan keltirip, jábirlenýshiniń ólimine ákep soqqany úshin - 300 myń som (shamamen 3,5 myń dollar);
- jábirlenýshige І toptaǵy múgedektik belgilengeni úshin – 200 myń som (2,3 myń dollar);
- jábirlenýshige ІІ toptaǵy múgedektikti belgilengeni úshin – 150 myń som (1,75 myń dollar);
- jábirlenýshige III top múgedektigi belgilengeni úshin – 100 myń som (1,16 myń dollar);
- jábirlenýshige «múgedek bala» sanaty belgilengeni úshin – 200 myń som (2,3 myń dollar);
- múgedektik belgilenbese de, deneni jaraqattaý nemese densaýlyqqa ózge de zaqym keltirgeni úshin - ambýlatorlyq jáne (nemese) statsıonarlyq emdeýge jumsalǵan naqty shyǵyn mólsherinde, biraq 100 myń somnan (1,16 myń dollar) aspaıdy;
- jábirlenýshilerdiń múlkine zııan keltirgeni úshin - keltirilgen zııan mólsherinde, biraq árbir jábirlenýshige 150 myń somnan (1,75 myń dollar) jáne barlyq jábirlenýshilerge 450 myń somnan (5,25 myń dollar) aspaıtyn mólsherde.
Gúlmıra Ábdirahmanova