Qyrǵyzstanda kazıno oınaýǵa keletin sheteldikter úshin vızasyz rejım engiziledi
BІShKEK. QazAqparat – Qyrǵyzstanda arnaıy oıyn aımaǵyna baratyn sheteldikter úshin elge vızasyz kirý usynylyp otyr. Sáıkes zań jobasy qoǵamdyq talqyǵa shyǵaryldy, dep habarlaıdy QazAqparat menshikti tilshisi Qyrǵyzstan Mınıstrler kabınetine silteme jasap.
Sheteldikterge Qyrǵyzstan aýmaǵyndaǵy arnaıy oıyn aımaǵyna barý úshin ǵana vıza rásimdemeı kirýge, shyǵýǵa, tranzıtpen júrýge, júrip-turýǵa ruqsat etiledi.
Kazınoǵa kelýshiler Qyrǵyzstanǵa kelgennen keıin tólqujat baqylaýynan ótý kezinde tek jaramdy jeke basyn kýálandyratyn qujat kórsetýi kerek.
Bul rette sheteldikter ýákiletti memlekettik organda tirkeýden ótpeı-aq Qyrǵyzstanda on bes táýlik bola alady.
Budan basqa, zań jobasynda sheteldik azamattar arnaıy oıyn aımaǵynyń shekarasyn zańsyz kesip ótse, bir jyldan úsh jylǵa deıingi merzimge túzetý jumystary nemese 500-den 1000 eseptik kórsetkishke deıingi aıyppul nemese eki jylǵa deıin bas bostandyǵynan aıyrý túrinde jazaǵa tartylatyny jazylǵan.
Ashyq kózderden alynǵan foto
