Qyrǵyzstanda qazaqstandyq jeńil atletıka jattyqtyrýshysy jol apatynan mert boldy
NUR-SULTAN. QazAqparat – Qyrǵyzstanda qazaqstandyq jeńil atletıka jattyqtyrýshysy Murat Júzgenbaev jol apatynan mert boldy, dep habarlaıdy QazAqparat tilshisi.
QR Mádenıet jáne sport mınıstrliginiń málimetinshe, jol apatynan kóz jumǵan jeńil atletıka jattyqtyrýshysy Murat Júzgenbaevtyń múrdesi Almaty oblysyna jetkiziledi.
«Murat Júzgenbaev 3 shildeden bastap Qyrǵyz Respýblıkasynyń Bosterı aýylynda oqý-jattyǵý jıynynda bolǵan. 16 shildede ol jeńil atletterge ilesip, velosıpedpen jol jıeginde kele jatty. Ókinishke qaraı, Bulan-Sógeti jáne Bosteri aýyldarynyń arasynda bolǵan jol apaty saldarynan bapker kóz jumdy. Marqumnyń týystary men jaqyndaryna kóńil aıtamyz», - dep atap ótedi vedomstvodan.
Murat Júzgenbaev 1964 jyly 19 aqpanda Almaty oblysynda dúnıege kelgen. KSRO sport sheberi, joǵary sanatty jattyqtyrýshy elimizdiń kóptegen tanymal sportshysyn tárbıelegen.
Buǵan deıin Qyrǵyzstannyń Bulan-Sógeti jáne Bosteri aýyldarynyń arasynda Lexus kóligi Nissan kóligine soqtyǵysyp, odan keıin velosıpedpen kele jatqan qazaqstandyq Murat Júzgenbaevty qaǵyp mert qylǵany týraly aqparat taraǵan edi.
