Qyrǵyzstanda qazaqstandyq sýretshilerdiń kórmesi ashyldy

BІShKEK. QazAqparat – Jaqynda Bishkektegi Gapar Aıtıev atyndaǵy Qyrǵyz ulttyq beıneleý óneri murajaıynda qyrǵyzdyń uly jazýshysy Shyńǵys Aıtmatovtyń 95 jyldyǵyna arnalǵan Qazaqstan Sýretshiler odaǵy Túrkistan oblystyq fılıalynyń «Dostyǵymyz jarasqan» toptyq óner kórmesi ashyldy, dep habarlaıdy QazAqparattyń menshikti tilshisi.

Kórme qoıylymyna tanymal kórkem sýretshiler men QR Sýretshiler odaǵy músheleriniń týyndylary qoıylǵan.

Olardyń qatarynda Qazaqstannyń eńbek sińirgen qaıratkerleri Ábdýahat Muratbaev, Nurlan Shılibaev, Edige Turlybekov, sonymen qatar Erǵalı Palymbetov, Quralbek Qosýaqov, Anaráli Tilenshi bar.

Kórme qatysýshylarynyń bári – túrli janrdaǵy kóptegen kartın salǵan, ózindik ereksheligi bar sheberler.

Kórmeniń ashylýy Halyqaralyq mýzeı kúnine oraı uıymdastyrylǵan «Mýzeı túni» aktsııasymen tuspa-tus keldi.

Oǵan kóptegen elorda turǵyny, sheteldik týrıst pen qala qonaqtary bardy.

Otandastarymyzdyń óner týyndylaryna úlken býyn ókilderi ǵana emes, jastar da qyzyǵýshylyq tanytty.

«Mýzeı túni» aktsııasyna kelýshilerge keramıka, bylǵary, qolóner, músindeý, sýret salý boıynsha sheberlik saǵattary uıymdastyryldy. Ekspozıtsııa zaldarynda qyrǵyz jáne orys tilderinde poetıkalyq keshter ótti, jergilikti aqyn men mýzykanttardyń týyndylary shyrqaldy. Ár kórermen áserge bólenip, jaǵymdy energııa jınap qaıtty.

Kórme 4 maýsymǵa deıin jalǵasady.