Qyrǵyzstanda Qazaqstan Respýblıkasynyń Mádenıet kúnderi ótedi

NUR-SULTAN. QazAqparat - 7-9 qazan aralyǵynda Bishkek qalasynda Qazaqstan Respýblıkasynyń Qyrǵyz Respýblıkasyndaǵy mádenıet kúnderi ótedi, dep habarlaıdy QazAqparat QR Mádenıet jáne sport mınıstrliginiń baspasóz qyzmetine silteme jasap.

Qazaqstan Respýblıkasynyń Mádenıet jáne sport mınıstrligi uıymdastyryp otyrǵan Mádenıet kúnderi aıasyndaǵy is-sharalar legi mynandaı:

7 qazanda «Manas» kıonoteatry zalynda Qazaqstan kıno kúnderiniń resmı ashylýy ótedi.

9 qazanǵa deıin Rústem Ábdirashevtiń «Almas qylysh», Aqan Sataevtyń «Tomırıs», «Jaý júrek myń bala», «Anaǵa aparar jol», «Qazaq handyǵy. Altyn taq» fılmderi men Turdybek Maıdan men Tilek Tóleýǵazynyń «Muzbalaq», Adaı Ábildınovtiń «Kúltegin» anımatsııalyq fılmi kórsetiledi.

7 qazan, saǵat 19:00-de T.Satylǵanov atyndaǵy Qyrǵyz ulttyq fılarmonııasynda Qazaqstan óner sheberleriniń Gala-kontserti ótedi. Kontsertte Qazaqstannyń halyq artısteri, Qazaqstannyń Eńbek Eri Álibek Dinishev, Roza Rymbaeva, Qazaqstannyń Halyq artısi Nurjamal Úsenbaeva, Qazaqstannyń halyq artısi, Qyrǵyz Respýblıkasynyń eńbek sińirgen qaıratkeri Altynbek Qorazbaev, Qazaqstannyń eńbek sińirgen artısi Maıra Muhamedqyzy jáne Qazaqstannyń ózge de tanymal oryndaýshylary men shyǵarmashylyq ujymdary óner kórsetedi.

8 qazan, saǵat 14:00-de G.Aıtıev atyndaǵy Qyrǵyz ulttyq beıneleý óneri mýzeıinde Qazaqstannyń arheologııalyq artefaktileri men beıneleý ónerinen syr shertetin kórme ótedi. Qyrǵyzstandyqtardyń nazaryna Uly Dala órkenıetin qurýshy – kóshpendilerdiń mádenı salttarynyń ártúrli qyryn jáne aspektilerin beıneleıtin elimizdiń Ortalyq memlekettik mýzeıiniń jáne Á. Qasteev atyndaǵy Memlekettik óner mýzeıiniń 70-ten astam biregeı jádigeri usynylady.

8 qazanda, saǵat 19:00-de A.Maldybaev atyndaǵy Qyrǵyz ulttyq Lenın ordendi akademııalyq opera jáne balet teatrynyń zalynda Ahmet Jubanov pen Latıf Hamıdıdiń «Abaı» operasyn Abaı atyndaǵy Memlekettik opera jáne balet teatry artısteri oryndaıdy.