Qyrǵyzstanda Qazaqstan medıtsınasynyń kúnderi bastaldy

BІShKEK. QazAqparat – Bishkek qalasynda Qazaqstannyń medıtsına kúnderi bastaldy. Eki kúndik sharaǵa elimizdiń Densaýlyq saqtaý mınıstri Eljan Birtanov bastaǵan 100-den astam delegat qatysýda, dep habarlaıdy QazAqparat tilshisi.

«Qyrǵyzstandaǵy qazaqstandyq medıtsına kúnderi – bul Qazaqstan men qyrǵyzstan densaýlyq saqtaý júıeleri arasyndaǵy yntymaqtastyqty kúsheıtýge, medıtsınalyq uıymdar arasyndaǵy ózara is-qımyldy keńeıtýge, eki eldiń azamattaryna medıtsınalyq kómek kórsetýdiń qoljetimdiligi men sapasyn qamtamasyz etý jolynda tájirıbe men bilimmen, ınoovatsııalar men tehnologııalarmen almasýǵa baǵyttalǵan shara», - dep jazdy Densaýlyq saqtaý mınıstrliginiń baspasóz hatshysy Gaýhar Bısarına Facebook paraqshasynda.

Sharanyń ashylý rásiminde qutyqtaý sóz sóılegen Eljan Birtanov eki memleket yntymaqtasǵynyń joǵary deńgeıin, tarıhı jáne mádenı tamyrlarynyń ortaqtyǵyn, sonymen qatar ózara qarym-qatynasty nyǵaıtyp, damytýda mundaı sharalardyń mańyzyn atap ótti.

QR Densaýlyq saqtaý mınıstriniń atap ótýinshe, el Prezıdenti Qasym-Jomart Toqaevtyń tapsyrmasy aıasynda 2020 jyldyń qańtarynan 2025 jylǵa qaraı densaýlyq saqtaý salasynyń shyǵystary qazirgi jalpy ishki ónimniń 3,2 paıyzynan 5 paıyzǵa jetetin bolady. Al Elbasy Nursultan Nazarbaevtyń tapsyrmasyna sáıkes 2025 jylǵa qaraı alǵashqy medıtsıalyq-sanıtarlyq kómek pen qoǵamdyq densaýlyqqa arnalǵan shyǵystardyń úlesi 60 paızǵa jetetin bolady.

Munan bólek Eljan Birtanov memlekettik qoldaýdyń jáne qarqyndy ári keshendi júrgizilgen jumystardyń nátıjesinde sońǵy 5 jylda ana ólimi 2,6 ese, týberkýlezden bolatyn ólim-jitim 5,4 ese, qan aınalymy aýrýlarynan bolatyn ólim 2,5 ese, onkologııadan bolatyn ólim 3,7 ese, al jaraqattanýdan bolatyn ólim-jitim 7,2 ese azaıǵanyn atap ótti. Sonymen qatar ol «Densaýlyq» memlekettik baǵdarlamasynyń qabyldanýy medıtsınalyq kómektiń tıimdiligi men qoljetimdiligin arttyrýǵa baǵyttalǵan qajetti ınstıtýttyq ózgeristerdi júzege asyrýǵa múmkindik bergenin aıtty.