Qyrǵyzstanda qazaq kınosynyń kúnderi ótedi
Atalǵan sharany elimizdiń Ulttyq kınony qoldaý memlekettik ortalyǵy jáne Qyrǵyzstannyń Mádenıet, aqparat, sport jáne jastar saıasaty mınıstrligi kınematografııa departamenti uıymdastyrady.
Sonymen qatar, oǵan T. Okeev atyndaǵy «Qyrǵyzfılm» ulttyq kınostýdııasy, Qyrǵyzstannyń Kınematografıster odaǵy men Sh. Aıtmatov atyndaǵy Kıno úıi qoldaý kórsetedi.
Ulttyq kınony qoldaý memlekettik ortalyǵynyń bólim basshysy Ásel Yrystyń aıtýynsha, kınoortalyq bıyl qazaqstandyq kıno kúnderin 15 shet memlekette ótkizýdi usynyp otyr.
«Bishkek – elimizdiń kıno kúnderi ótetin alǵashqy qala. Osyǵan baılanysty «Ala-Too» kınoteatrynda Bolat Qalymbetovtyń «Muqaǵalı» jáne Aıjan Qasymbektiń «Ot» fılmderi usynylady. Ár kartınany ony túsirgen komanda tanystyrady. Bizdiń negizgi maqsatymyz – iskerlik baılanysty damytý jáne otandyq fılmderdi halyqaralyq deńgeıge shyǵarý. Sondaı-aq, birlesken jobalardy iske asyrý úshin seriktester men ınvestorlardy tartý», - dep atap ótti Ásel Yrys.
«Muqaǵalı» kınokartınasynda kórnekti aqynnyń ómiriniń sońǵy jyldary baıandalǵan. Fılm 25-shi Tallın kınofestıvalinde táýelsiz qazylar alqasynyń arnaıy syılyǵyn ıelengen.
Al, «Ot» fılminiń álemdik premerasy byltyr Pýsandaǵy halyqaralyq kınofestıvalde ótti. Sondaı-aq, kartına Germanııadaǵy «Film Festival Cottbus» jáne Sıngapýrdaǵy «Singapore International Film Festival» kınofestıvalderinde usynyldy.
Týyndyda basty róldi somdaǵan Tólepbergen Baısaqalov Sochı, Los-Anjeles jáne Sıngapýr kınofestıvalderinde marapatqa ıe boldy.
Sonymen qatar, «Ot» kınofılmi Mınskide ótken «Listapad» halyqaralyq kınofestıvalinde «Úzdik rejısserlik jumys» jáne «Úzdik mýzyka» nomınatsııalarynda júlde aldy.
Qyrǵyz Respýblıkasyndaǵy qazaqstandyq kıno kúnderi aıasynda Ulttyq kınony qoldaý memlekettik ortalyǵynyń tusaýkeseri ótedi. Іs-sharaǵa qatysý tegin.
