Qyrǵyzstanda qańtar aıynda ınflıatsııa 1,5 paıyzdy qurady

BІShKEK. QazAqparat – Qyrǵyzstanda 2023 jyldyń qańtarynda ótken jyldyń jeltoqsan aıymen salystyrǵanda tutynýshylyq baǵalar men tarıfter ósimi 1,5%-dy qurady, dep habarlaıdy QazAqparat tilshisi Qyrǵyzstan Respýblıkasynyń Ulttyq statıstıkalyq komıtetine silteme jasap.

Elde azyq-túlikke de, azyq-túlikke jatpaıtyn taýarlarǵa da baǵanyń ósýi baıqaldy. Azyq-túlik taýarlarynyń ishinde eń kóp qymbattaǵany – jańa pisken kókónister (14,5%), kartop (7,8%), kúrish (3,3%), balyq (2,5%), sút ónimderi, irimshik jáne jumyrtqa (2,3%-ǵa). Bul rette maı baǵasynyń 1,7%-ǵa, qaraqumyqtyń 1,4%-ǵa, jylqy etiniń 0,8%-ǵa jáne qanttyń 0,3%-ǵa tómendeýi baıqaldy.

Elde azyq-túlik jáne alkogolsiz sýsyndarmen bir mezgilde alkogol jáne temeki ónimderiniń baǵasy 1,7%-ǵa, azyq-túlikke jatpaıtyn taýarlar 1,6%-ǵa, halyqqa kórsetiletin qyzmet tarıfteri 0,6%-ǵa ósti.

Aǵymdaǵy jyldyń qańtar aıynda tutyný baǵasynyń ósýi eldiń barlyq óńirlerinde baıqaldy.

Bul rette eń joǵary baǵalar Naryn oblysynda boldy. Munda azyq-túlik emes taýarlardyń (4,0%-ǵa), azyq-túlik taýarlary men alkogolsiz sýsyndarynyń (3,7%-ǵa), halyqqa kórsetiletin qyzmet tarıfteri 3,2%-ǵa qymbattady. Ońtústik astanada alkogol men temeki ónimderiniń baǵasy 2,8% qymbat baǵamen satyldy.