Qyrǵyzstanda I-IV ǵasyrdaǵy adam súıekteri men zattar tabyldy
BІShKEK. KABAR – QazAqparat – Qyrǵyz Respýblıkasynyń Batken oblysy Qyzyl-Qoshýýn alqabynda arheologııalyq qazba jumystary kezinde shamamen I-IV ǵasyrlarda ómir súrgen adamdardyń súıegi tabyldy. Bul týraly QazAqparat Qyrǵyzstannyń Kabar agenttigine silteme jasap habarlaıdy.
Batken memlekettik ýnıversıtetiniń málimeti boıynsha, qazba jumystary júrgen aımaqta zırat, mola, arhıtektýra nysandary, úı men petroglıfteri bar. Bul jerde keıingi zertteýler 1954-1960 jyldary júrgizilgen.
Arheologııalyq ekspedıtsııa basshysy, tarıh ǵylymdarynyń kandıdaty Ábdinábı Qadyrovtyń aıtýynsha, qazý kezinde tabylǵan eskertkishter Qarabulaq zıraty dáýirine jatýy múmkin. Bul alqaptan 150-200 arheologııalyq eskertkish tabyldy.
Onyń sózinshe, zertteý barysynda 1-4 ǵasyrlarda ómir súrgen adamdardyń jeke zattary tabylǵan.
«Adammen birge kómilgen saýyt, 3 pyshaq, qanjar, jebeniń ushy men beldikter anyqtaldy. Qarabulaq eskertkishteri 1-4 ǵasyrlarǵa jatady. Sol kezdegi salt boıynsha, qaıtys bolǵan adamnyń janyna jeke zattary, áıelderdiń janyna áshekeı buıymdar, bas jaǵyna ydysqa salynǵan as qoıylatyn», - dep habarlady ǵalym.
Ol tabylǵan zattar radıokómirtek taldaýyn jasaý úshin Eýropa zerthanasyna jiberiletinin atap ótti.
«Zertteýden keıin qorǵannyń qaıdan shyqqanyn naqty bilemiz», - dedi Ábdinábı Qadyrov.
