Qyrǵyzstanda depýtattar Bishkek meriniń otstavkaǵa ketýin talap etti
BІShKEK. QazAqparat - Búgin Bishkek qalalyq kenesh depýtattary qala meri Albek Ibraımovke senimsizdik votýmyn bildirdi, dep habarlaıdy «QazAqparat» HAA-nyń menshikti tilshisi.
Búgin Bishkek qalalyq keneshiniń kezekten tys otyrysynda depýtattar qala merine senimsizdik votýmyn bildirý týraly sheshim shyǵardy.
Buǵan 7 shilde kúni vıtse-mer Renat Makenovtiń ustalýy sebep bolǵan. Ol zańsyz jer ýchaskelerin bólý deregine qatysty qylmystyq isti tergep-tekserý aıasynda ustaldy. Al Bishkek meri 10 shildeden 8 tamyzǵa deıin eńbek demalysyna ketken bolatyn.
A. Ibraımovtiń qala ómirindegi osyndaı qysyltaıań tusta demalysqa ketkeni depýtattardyń yzasyn keltirgen. Osyǵan baılanysty qalalyq kenesh kezekten tys otyrys shaqyrdy.
«Qysqa, meıramdarǵa daıyndyq júrgizý kerek, qanshama joldar salynýy tıis. Osynyń bári jazda isteledi. Búkil jumys bir ornynda tur, al birinshi vıtse-mer qamaýda jatqan kezde onyń demalysqa ketkenin qalaı túsinýge bolady? Qala basshysy jaýapty tulǵa bolýy tıis!», - deıdi qalalyq kenesh tóraǵasy Almaz Kenenbaev.
Osydan keıin depýtattar óz kanıkýldarynan bas tartty.
Bishkek meri bul otyrysqa qatysqan joq. Biraq artynsha BAQ-ta vıdeorolık jarııalandy.
«Ókinishke qaraı, men Bishkek keneshinde bolyp jatqan oqıǵalar týraly keıin bildim. Men úsh kún taýda boldym. Jýyq arada naqty málimdeme jasaımyn. Búgingi sheshim saıası tapsyrys dep oılaımyn. Sondyqtan aldaǵy ýaqytta tikeleı efırde suhbat berýge daıynmyn», - deıdi mer.
Albek Ibraımov 2016 jyldyń aqpanynda Bishkek meri bolyp saılanǵan. Onyń otstavkaǵa ketý-ketpeýi týraly qorytyndy sheshimdi eldiń premer-mınıstri qabyldaıdy.
