Qyrǵyzstanda depýtat paranjaǵa tyıym salýdy usyndy

BІShKEK. QazAqparat – Qyrǵyzstanda qoǵamdyq oryndarda betti tolyǵymen jasyratyn paranja kııýge zańnamalyq deńgeıde tyıym salý usynyldy. Bul týraly 7 qyrkúıek kúni Qyrǵyzstan Respýblıkasy Jogorký Keneshiniń otyrysynda depýtat Sharapatkan Májıtova málimdedi, dep habarlaıdy QazAqparat tilshisi.

Parlamentarııdiń pikirinshe, sońǵy kezderi elde oramaldyń ornyna bet-júzin tolyǵymen búrkeıtin qara paranja kıetin áıelder sany ósken. Sh.Májıtova Qyrǵyzstan Ózbekstannan úlgi alyp, qoǵamdyq oryndarda adamnyń betin jasyryp, tulǵasyn anyqtaýǵa múmkindik bermeıtin kıim kııýge tyıym salatyn dál osyndaı zańdy qabyldaýy kerek dep sanaıdy.

«Men áıelderdiń oramal taǵýyna qarsy emespin. Sonymen qatar, qoǵam úshin ózin tanytýǵa múmkindik bermeı, betterin qara jamylǵymen jabýdy qaýipti dep sanaımyn. Bul ulttyq qaýipsizdikke áser etýi múmkin. Osyǵan baılanysty mınıstrler kabınetinen memlekettik deńgeıde sharalar qabyldaýdy suraımyn», - dedi depýtat.