Qyrǵyzstanda daýǵa qalǵan «Sebat» túrik lıtseıleri jabylýy múmkin
BІShKEK. QazAqparat - Qyrǵyzstanda esek etin eldegi saýda oryndaryna jáne jappaı tamaqtaný jelilerine jetkizgenderge qatysty daý órship, «Sebat» túrik lıtseılerine qatysy bar ekeni aıtyldy, dep habarlaıdy "QazAqparattyń" Qyrǵyzstandaǵy tilshisi Serik Esqalıev.
Atalǵan máselege qatysty Túrkııanyń buqaralyq aqparat quraldarynda «Sebat» qyzmetkerlerin aıyptaǵan birqatar maqalalar jaryq kórdi. Onda Túrkııa azamattary esek soıyp, kondıtsııaǵa sáıkes emes et ónimin bilim mekemelerindegi ashanalarǵa jetkizdi dep jazylǵan. Buǵan deıin Qyrǵyzstan BAQ-tarynda Tokmok qalasyndaǵy «Sebat» túrik lıtseıi oqýshylarynyń sapasyz sút ónimin iship, ýlanǵany, sol úshin bilim mekemesi qyzmetin toqtatqany týraly da maqalalar jarııalanǵan. Búgin parlament otyrysynda sóz sóılegen SDPK fraktsııasynyń depýtaty Erkın Sákebaev Tokmok qalasyndaǵy «Sebat» lıtseıine júrgizilgen tekserý qorytyndylaryn málimdedi. Onyń aıtýynsha, lıtseıde kúnine 4 ret ystyq tamaq beriledi. Al, balalar jappaı ýlanǵan 20 aqpan kúni lıtseıde tańǵy asqa qaımaǵy alynbaǵan sút qosylǵan irimshik, sháı jáne nan berilgen. Saǵat 11.00-16.00 aralyǵynda medıtsınalyq orynǵa tamaqtan ýlaný belgisimen 57 bala shaǵymdanypty. «Olarǵa medıtsınalyq kómek kórsetilgenimen, 12 adam Tokmok qalasy aýrýhanasynyń juqpaly aýrýlar bólimine jatqyzyldy. Tekseris kezinde sanıtarlyq-gıgıenalyq normalar qoıylǵan talaptarǵa sáıkes emestigi anyqtaldy», - dedi depýtat E.Sekebaev. QR Parlamenti «Ata-Jurt» fraktsııasynyń depýtaty Jyldyzqan Joldasheva Qyrǵyzstandaǵy barlyq «Sebat» lıtseıleriniń qyzmetin tekserý jáne zań buzý anyqtalǵan jaǵdaıda olardy jabý kerektigin aıtty. «Men saıttardan Túrkııa Prezıdenti Redjep Taıyp Erdoǵannyń atalǵan mektepter týraly jaǵymsyz pikir bildirgeni týraly oqyǵan edim. Áriptesterimdi bul bilim mekemelerine muqııat nazar aýdarýǵa shaqyramyn. Olardy quqyq qorǵaý organdary nemese Úkimet qurǵan komıssııa teksersin. Tek, sanıtarlyq normalardyń saqtalýyn ǵana emes, barlyq oqý baǵdarlamasyn da tekserý qajet», - dedi depýtat. «Túrkııa Prezıdenti R.Erdoǵan dinı kósem Fethýllah Gúlenniń «parallel qurylymdaryn» túrik memleketin joıý maqsatymen mektep-lıtseıler jelisi arqyly qarajat jınaǵanyn aıyptaǵan. Gúlen baǵdarlamalary boıynsha mektepter jelisi Túrkııa jáne el syrtyndaǵy bilim berý mekemelerin (sonyń ishinde «Sebat» mektepter jelisi) qamtyp otyr. Al osy atalǵan máselege qatysty Qyrǵyzstandaǵy «Sebat» bilim mekemeleriniń prezıdenti Orhan Inan túrik basylymdaryn esek etin vedomstvo qaramaǵyndaǵy mektepterdegi ashanalarǵa jetkizgeni týraly jalǵan aqparat úshin sotqa beretinin málimdedi.
