Qyrǵyzstanda COVID-19 antıdenelerine zertteýdiń úshinshi kezeńi ótip jatyr
BІShKEK. QazAqparat – Qyrǵyzstanda 31 qazan men 4 qarasha aralyǵynda turǵyndarda COVID-19 vırýsyna ımmýnıtettiń baryn anyqtaý boıynsha zertteýdiń úshinshi kezeńi ótip jatyr, dep habarlaıdy QazAqparat menshikti tilshisi Qyrǵyzstannyń densaýlyq saqtaý mınıstrligine silteme jasap.
Zertteýler Qyrǵyzstan azamattarynyń ártúrli jas toptarynda jáne tegin júrip jatyr. Maqsat – epıdemııanyń taralýyn boljaý, ınfektsııadan keıingi ımmýnıtettiń saqtalý uzaqtyǵyn jáne vaktsınatsııanyń tıimdiligin baǵalaý, sondaı-aq koronavırýs ınfektsııasymen kúres sharalaryn ázirleý.
Aldyńǵy kezeńderge qatysqan 9 myńnan astam erikti osy jolǵy zertteýge de engizildi. COVID-19 antıdenelerin nemese vaktsınalaýdan keıingi antıdenelerdi anyqtaý úshin olardan qan alynady, nátıjesi boıynsha qatysýshylarǵa tıisti qorytyndy beriledi.
