Qyrǵyzstanda bosanyp qalǵan qazaqstandyq elge jetkizildi - SІM
ASTANA. QazAqparat - Qyrǵyzstanda merziminen buryn bosanǵan áıel sábıimen birge Qazaqstanǵa jetkizdi, dep habarlaıdy QazAqparat tilshisi QR SІM baspasóz qyzmetine silteme jasap.
«5 shildede Ystyqkólde demalyp júrgen qazaqstandyqtyń merziminen buryn tolǵaǵy bastalǵan. Alaıda, Sholpan Ata qalasyndaǵy perzenthanada shala týǵan nárestelerge jaǵdaı jasalmaǵan. Soǵan baılanysty júkti áıelge neonatologııalyq kómek kórsetýden bas tartqan», - dep habarlady SІM baspasóz hatshysy Aıbek Smadııarov QazAqparat tilshisine.
Qyrǵyzstandaǵy Qazaqstan konsýlynyń belsendi aralasýymen júkti áıeldi Bishkektegi Ulttyq ana men bala ortalyǵyna jedel jetkizgen. 6 shildede dárigerler ony aman-esen bosandyryp alǵan.
«Bosanǵannan keıin ana men bala jansaqtaý bóliminde, dárigerlerdiń jiti baqylaýynda boldy. Sábı shala týǵan balalarǵa arnalǵan arnaıy qurylǵyǵa qosyldy. Jeti aılyq balanyń salmaǵy 1 kg 985 gramm bolǵan», - dedi Aıbek Smadııarov.
Qazaqstan elshiliginiń konsýldyq bólimi Bishkektegi Ana men ortalyǵy men Jambyl oblystyq perınataldyq ortalyǵy arasynda tikeleı baılanys ornatty. Sonyń nátıjesinde balany Taraz qalasyna jetkizý týraly sheshim qabyldandy.
«Jambyl oblystyq densaýlyq saqtaý basqarmasy balany jetkizý úshin medıtsınalyq arnaıy kólik berdi. QR Elshiligi ony «Qordaı-Aqjol» baqylaý-ótkizý beketi arqyly memlekettik shekaradan ótkizýge barlyq jaǵdaı jasady», - dep túsindirdi Aıbek Smadııarov.
