Qyrǵyzstanda bir muǵalim 4 túrli pánnen dáris berýge májbúr
ALMATY. 25 aqpan. QazAqparat - Qyrǵyzstanda qazir 52 joǵary oqý orny bar. Bul týraly Almatyda is-saparmen júrgen Bishkektegi Júsip Balasaǵun atyndaǵy Qyrǵyz ulttyq ýnıversıtetiniń Pedagogıkalyq kadrlardy maqsatty daıyndaý ınstıtýtynyń dırektory Rahat Sýlaımanova QazAqparat tilshisine bergen suhbatynda aıtty.
«Keńes dáýirinde 11 joǵary oqý ornynyń altaýynda pedagogıkalyq kadrlar daıyndalatyn. Elimizde áli kúnge deıin pedagogtar daıyndaýǵa mamandanǵan birde-bir arnaıy joǵary oqý orny joq. Qyrǵyzstanda jylyna 120 myń oqýshy mektep bitirse, sonyń 70 myńy joǵary oqý oryndaryna túsedi. Elimizde 31 memlekettik, 21 jekemenshik joǵary oqý orny bar. Alaıda onda joǵary bilim alǵan mamandardyń bári birdeı jumys taba almaıdy. Jumyssyzdyqtyń saldarynan olardyń keıbiri shet elderge ketýge májbúr. Máselen resmı statıstıka boıynsha 4 myńdaı muǵalim jetispeıdi dep aıtylady. Biraq bul san odan birneshe ese joǵary», - deıdi Bilim berý isiniń úzdik qyzmetkeri R.Sýlaımanova. Rahat Toqtoǵulqyzynyń aıtýynsha, muǵalimderdiń aılyǵy az. Sondyqtan mektepterde kóbine zeınetaqy jasyndaǵy muǵalimder jumys jasaıdy. Mamandar jetispegen soń 2 stavkadan joǵary júktememen jumys isteıdi. Tipti 4 túrli sabaqtan dáris berip júrgender bar. Sondaı-aq syrttaı bitirgender kóp, keıbir aýyldarda orta bilimdi muǵalimder jumys jasaıdy. Bul bilim berý sapasyna óz áserin tıgizýde.
«Bul ahýaldy ońaltýǵa túrtki bolý úshin 2009 jyly bizdiń ınstıtýt ashyldy. Ol mektepter men aýyl úkimetteriniń bilim berý basqarmalarymen 3 tarapty kelisim túzip, is berýshilermen tikeleı jumys isteýde. Onda mektep bitirýshiler jergilikti basqarý organdarynan joldama alady. Olar oqý aqysyn tólegennen keıin jas mamandar mamandyq alyp shyqqan soń óz aýyldaryna baryp jumys isteıdi. Eger eńbek etpese, oqý tólemderin tolyq qaıta tóleıdi. Olardyń dıplomdaryn biz aýyl úkimetterine beremiz. Bul bir jaǵynan jumyssyzdyqty sheshýge, ekinshi jaǵynan muǵalimdikke qyzyqtyrý arqyly jastardy jergilikti jerlerdi kóterýge jumyldyrý maqsatynda júrgizilip jatyr. Árıne memlekettik deńgeıde sheship jatyrmyz dep aıta almaımyz. Degenmen áreket jasalyp jatyr», - deıdi R.Sýlaımanova.
12,5 myń stýdenti bar Júsip Balasaǵun atyndaǵy Qyrǵyz ulttyq ýnıversıtetiniń Pedagogıkalyq kadrlardy maqsatty daıyndaý ınstıtýtyn 4 jylǵa jýyq ýaqyt ishinde 300-den astam stýdent bitirip shyqqan. Onyń 148-i joǵary bilim bóliminde biliktiligin arttyryp jatsa, 98-i aıyl úkimetterimen jasalǵan kelisim boıynsha týǵan jerine baryp pedagog qyzmetin atqarýda. Jalpy bul oqý ornynda 12 mamandyq boıynsha pedagogıkalyq mamandar daıarlanady.
