Qyrǵyzstanda «Batken oqıǵalary kúnin» belgileý usynyldy
BІShKEK. QazAqparat - 13 qańtarda Qyrǵyz Respýblıkasynyń vıtse premer-mınıstri Ábdirahman Mamatalıev Batken jaýyngerleri respýblıkalyq komıtetiniń bastamashyl tobymen kezdesti. Bul týraly Qyrǵyzstan Respýblıkasy Úkimetiniń baspasóz qyzmetinen habarlady.
Birlestiktiń ókilderi Á.Mamatalıvke Batken oblysynda ornalasqan shekara qyzmetiniń bólimderi men bólimshelerine tájirıbelik kómek kórsetý boıynsha ótkizilip júrgen jumys jóninde aıtyp, sondaı-aq jastarmen ótkiziletin jumys týraly da aqparat berdi. Komıtet múshelerine 1999-2000 jyldary Batken oblysyndaǵy áskerı is-qımyldardyń qatysýshylary men olardyń otbasylaryna kórsetip otyrǵan kómegi úshin alǵys bildirildi. «Batken oqıǵalary - egemen Qyrǵyzstannyń basyna túsken birinshi synaq. Shabýylǵa tótep bere alyp, biz Otanymyzdy qorǵap qala alatymyzdy dáleldeı aldyq», - dep atap ótti Á.Mamatalıev. Kezdesý aıasynda komıtettiń bastamasymen 1999 jyldyń 1 maýsymynan bastap, 2000 jyldyń qarashasyna deıin Qyrǵyzstan aýmaǵyn sheteldik lańkestik toptarynan qorǵaý boıynsha áskerı is-qımyldarǵa qatysqan áskerı qyzmetkerlerdiń áleýmettik quqyǵyn qorǵaý maqsatymen alǵa jyljytylǵan zań jobasy talqylandy. Atalǵan zań jobasy 30 myńnan astam qol jınap, Qyrǵyzstan Respýblıkasy Parlamentine qaralýǵa engizildi. Vıtse-premer-mınıstr Á.Mamatalıev Úkimet Apparatyna komıtetpen birigip, Batken oblysyndaǵy áskerı is-qımyldardyń aıaqtalýyna 15 jyl tolýyn merekeleý boıynsha sharalar josparyn qurýdy, sondaı-aq 26 qazan kúnin Batken oqıǵalary kúni dep jarııalaý týraly máseleni qarastyrýdy tapsyrdy, dep atap ótti Qyrǵyzstan Respýblıkasy Úkimetiniń baspasóz qyzmetinen.
