Qyrǵyzstanda baǵa men tarıf bir jylda 14,7 paıyzǵa ósti
BІShKEK. QazAqparat – Qyrǵyzstanda 2022 jyldyń qańtar-jeltoqsan aılarynda tutynýshylyq baǵalar men tarıfter 14,7%-ǵa ósti, dep habarlaıdy QazAqparat tilshisi Qyrǵyzstan Respýblıkasynyń Ulttyq statıstıka komıtetine silteme jasap.
Usynylǵan statıstıkalyq málimetterge sáıkes, elde alkogol men temeki ónimderiniń quny 24,4%-ǵa, azyq-túlik jáne alkogolsiz sýsyndar – 15,8%-ǵa, azyq-túlik emes taýarlar – 12,7%-ǵa jáne halyqqa kórsetiletin qyzmet tarıfteri – 9,1%-ǵa ósti.
Aǵymdaǵy jyly azyq-túlik taýarlarynyń ishinde balyq – 32,5%, qant – 30,5%, un – 27,8%, sút ónimderi – 26,8%-ǵa, makaron jáne basqa da dándi daqyldar – 25,5%, nan ónimderi – 22,6%, sary maı – 22,3%, keptirilgen jemister men jańǵaqtar – 20,6%, kúrish – 19,7%, shoshqa eti – 19,3%, nan – 17,4%, alkogolsiz sýsyndar – 16,1%, qaraqumyq – 12,1%, sıyr eti – 12,2% jáne qoı eti – 11,7%-ǵa qymbattaǵan.
2021 jylǵy jeltoqsanmen salystyrǵanda 2022 jylǵa arnalǵan tutyný baǵalary men tarıfteriniń ósýi respýblıkanyń barlyq aımaqtarynda baıqaldy. Bul rette baǵanyń maksımaldy kóterilýi Naryn oblysynda (18,4%) tirkeldi, onda alkogoldik ishimdikter men temeki ónimderi birden 43,3%-ǵa qymbattaǵan.
