Qyrǵyzstanda azyq-túlik baǵasy 12,6 paıyzǵa qymbattady

BІShKEK. QazAqparat - Qyrǵyzstanda jyl basynan beri 12,6 paıyzǵa qymbattaǵan azyq-túlik baǵasymen qatar ekonomıkalyq kórsetkishter de ósýde, dep habarlaıdy QazAqparat tilshisi Qyrǵyz Respýblıkasynyń Ulttyq statıstıkalyq komıtetine silteme jasap.

Statıstıkalyq málimetterge sáıkes, aǵymdaǵy jyldyń eń qymbat ónimderiniń ishinde qant 41%-ǵa, un 25,5%-ǵa, jańa pisken jemister 20,7%-ǵa, sút ónimderi 16,7%-ǵa, nan 14,5%-ǵa, qaraqumyq – 14,3%, balyq – 13,4%, alkogolsiz sýsyndar – 13,2%, qoı eti – 12,9%, sıyr eti – 7%, jańa pisken kókónister – 3,7%-ǵa qymbattady.

Jyl basynan beri respýblıka boıynsha tutyný baǵalary men tarıfterdiń ósýi 9,6%-dy qurady. Azyq-túlik ónimderimen qatar alkogoldik ishimdikter men temeki ónimderiniń baǵasy 12,9%-ǵa, azyq-túlik emes taýarlardyń baǵasy 5,6%-ǵa, halyqqa kórsetiletin qyzmetterdiń tarıfi 4,9%-ǵa qymbattady.

Baǵalar men tarıfterdiń ósýi eldiń barlyq aımaqtarynda baıqaldy. Bul rette eń joǵary kórsetkish Qyrǵyzstan Respýblıkasynyń Naryn oblysynda (14,4%) tirkeldi, sebebi alkogoldik ishimdikter men temeki ónimderi (27,1%-ǵa) qymbattaǵan.