Qyrǵyzstanda aıyptalýshylardy sot zalynda órtep jiberdi
ASTANA. QazAqparat - Qyrǵyzstan Respýblıkasy Narynqol oblysynda qaza bolǵan er adamnyń týysqandary onyń ólimine qatysty dep aıyptalǵan 3 mılıtsıonerdi sot zalynda ústerine benzın shashyp, órtep jiberdi, dep habarlaıdy kyrtag.kg.
2013 jyldyń jeltoqsan aıynda jergilikti turǵyn Aıbek Mámbetalıevti 3 mılıtsıoner qujatyn teksermek bolyp toqtatyp, uryp-soǵyp ketken. Alǵan jaraqattarynan A. Mámbetalıev oqıǵa ornynda jan tapsyrdy.
Atalǵan qylmysqa qatysty sot otyrysyna marqumnyń barlyq týǵan-týystary men kórshileri, bas-aıaǵy 70-80 adam jınaldy. Olar sottyń úkimin kútpesten, óz sheshimderin shyǵaryp, temir tordyń ar jaǵynda otyrǵan aıyptalýshy 3 mılıtsıonerge benzın toltyrylǵan bótelke laqtyryp, órtep jiberdi. Abyroı bolǵanda, AІІB qyzmetkerleri órtti der kezinde sóndirip úlgerdi. Degenmen bir aıyptalýshyny kúıik shaldy. Ekinshisin marqumnyń týystary qaraýyldyń qolynan julyp alyp, ólimshi qylyp uryp, jergilikti aýrýhanaǵa laqtyryp ketken. Al úshinshi aıyptalýshynyń qazir qaıda ekeni belgisiz. «Qazirgi ýaqytta oqıǵa ornynda tergeýshiler jumys jasaýda. Búlikti bastaǵandar anyqtalyp, úshinshi aıyptalýshy izdestirilýde», - dep habarlady Qyrǵyz Respýblıkasynyń ІІM baspasóz qyzmetinde.
