Qyrǵyzstanda áıelderge arnalǵan bólek meshit salynady
ASTANA. 6 sáýir. QazAqparat - Kóp uzamaı Qyrǵyzstannyń Osh qalasynyń ortalyq meshiti janynan áıelderge arnalǵan bólek qulshylyq úıi turǵyzylady.
Qyrǵyzstan musylmandary dinı basqarmasynyń jergilikti bólimshesiniń KGinform atty aqparat portaly habarlaǵandaı, júz adamǵa shaqtalǵan ǵıbadat úıiniń qurylysy bastalyp ta ketken kórinedi. Osy maqsatta 2 mıllıondaı som bólingen. Bul týraly muslim.kz saıty jazady.
«Áıelderge meshit turǵyzý bastamasy osydan bir jyl buryn kóterilgen bolatyn. Osylaısha, jergilikti dindarlar musylman áıelderdiń dinı saýatyn arttyryp, teris aǵymdardyń yqpalynan saqtandyrýdy kózdeıdi. Belgili bolǵandaı, ózge aǵym ókilderi otbasy, oshaq qasyndaǵy áıelder úshin túrli úıirmeler uıymdastyryp, basqa da aıla-sharǵylar arqyly olardyń basyn aınaldyryp, óz jaǵyna tartady», dep jazady muslim.kz.
Aıtpaqshy, joba keıbir bılik basyndaǵy laýazymdy tulǵalardyń kóńilinen shyqqan eken.
