Qyrǵyzstanda aýyzsý baǵasy qymbattaıdy

BІShKEK.QazAqparat - Qyrǵyzstanda aýyzsý baǵasy kóteriledi dep kútilýde, dep habarlaıdy QazAqparat tilshisi Qyrǵyzstan Respýblıkasy Mınıstrler Kabınetiniń baspasóz qyzmetine silteme jasap.

Respýblıkadaǵy aýyz sýdyń qazirgi tómen tarıfi kórsetiletin kommýnaldyq qyzmetterdiń qunynan tómen. Bul sýmen jabdyqtaý jáne sý burý jelilerin durys paıdalanýǵa, jańǵyrtýǵa jáne rekonstrýktsııalaýǵa múmkindik bermeıdi.

Osyǵan oraı, Qyrǵyzstan Respýblıkasynyń Úkimet basshysy Aqylbek Japarov aýdandyq memlekettik ákimshilikter men jergilikti ózin-ózi basqarý organdarynyń basshylarymen ótken respýblıkalyq keńes barysynda bıylǵy jyly aýyzsýǵa tarıf saıasatyn qaıta qaraý qajettigin aıtty.

Olarǵa aýyzsý tarıfiniń qunyn anyqtaý boıynsha ádistemelik usynystar, normatıvtik-quqyqtyq aktiler jáne quqyqtyq qujattardy jedel daıyndaý tapsyryldy. Qazir qala turǵyndary 1 tekshe metr sý úshin 5,38 som tólep júr, al onyń óz quny – 7,70 som.

Sýdyń 1 tekshe metri úshin kommýnaldyq tarıf Shý oblysynda 8 som, Jalal-Abad oblysynda - 15 som, Ózgen aýdanynda 39 som bolyp belgilendi.

Sonymen qatar, jergilikti BAQ-tyń habarlaýynsha, mamandar sý baǵasy kóterilgen jaǵdaıda eldegi áleýmettik shıelenistiń kúsheıýin boljap otyr. Máseleni sheshý úshin mysaly, jappaı esepke alý quraldaryn ornatý jáne respýblıka boıynsha sý shyǵynyn azaıtý sııaqty balama joldar usynyldy.

Avtor Gúlmıra Ábdirahmanova

Foto: gov.kg