Qyrǵyzstanda atys qarýynan mert bolǵan qazaqstandyq tabyldy
ASTANA. QazAqparat - Atys qarýynan mert bolǵan Qazaqstan azamaty Qyrǵyzstannyń Shý oblysynan tabyldy. Bul týraly Qyrǵyzstannyń Іshki ister mınıstrligi málim etti, dep habarlaıdy QazAqparat tilshisi.
2019 jylǵy 25 aqpanda saǵat 9:00 kezinde Qoı-Tash aýyly mańynda «Mazda-6» markaly kóliginen 20-25 jastaǵy belgisiz er adamnyń denesi tabylǵan. Alamýdýn Іshki ister basqarmasy sotqa deıingi tergeý amaldaryn bastady. Oqıǵa ornynda tergeý toby atalǵan adamnyń aty-jónin anyqtady. Ol 1994 jyly dúnıege kelgen Shermatov Atanuh esimdi Qazaqstan azamaty bolyp shyqty. Negizi, Jalal-Abad oblysynyń týmasy bolǵan A. Shermatov Bishkek qalasynda turaqtaǵan eken.
Tártip saqshylarynyń habarlaýynsha, avtokólikti tekserý kezinde iPhone 6 telefony, qujattar, araq shólmegi men temeki tabyldy. Er adamnyń samaı tusyna atys qarýynan jaraqat túsken, sondaı-aq qolynda Makarov tapanshasy bolǵan. Kólik salonynan oq pen gılza tabyldy.
«Marqumnyń denesi tabylǵan avtokólikti jaqyn jerde jumys istep júrgen qurylysshylar baıqaǵan. Jedel sharalar barysynda er adamnyń sońǵy ret kimmen baılanysqa shyqqany, onyń ishinde ózine qol jumsaý sebepteri tekserildi. Onymen dostyq qatynasta bolǵan adamdar anyqtaldy. Dostary tabylǵan tapanshanyń Shermatovqa tıesili ekenin rastady, sebebi ol qarýdy buǵan deıin dostaryna kórsetken eken. Tanystarynyń keıbiri mert bolǵan er adamnyń sýıtsıdke beıim ekenin baıqaǵan. Sonymen qatar, sońǵy kezderi onyń ýaıymǵa salynyp júrgenin kórgen», - delingen mınıstrlik málimetinde.
Aldyn ala derekterge qaraǵanda, oqıǵa ornynan tabylǵan tapansha 2005 jyldyń naýryzyndaǵy jappaı tártipsizdik kezinde Jalal-Abad qalasyndaǵy ishki ister bóliminde joǵalǵan nemese urlanǵan qarý retinde tirkelgen.
