Qyrǵyzstanda alǵash koronavırýs anyqtalǵan naýqas qaıtys boldy
BІShKEK. KABAR-QazAqparat – COVID-19 koronavırýs ınfektsııasy rastalǵan alǵashqy naýqas qaıtys boldy, dep habarlaıdy QazAqparat KABAR agenttigine silteme jasap.
«2 sáýir kúni Osh oblysynyń Noqat aýmaqtyq aýrýhanasynda 61 jastaǵy patsıenttiń bıologııalyq ólimi tirkeldi. Naýqas shetelden kelip, statsıonarlyq oqshaýlaýda bolǵan, keıin em qabyldaǵan. PTsR synamasy júrgizilip, COVID-19 ınfektsııasy rastalǵan», - delingen COVID-19 vırýsymen kúres jónindegi respýblıkalyq shtab habarlamasynda.
Habarlamada atap ótkendeı, patsıentte qosalqy aýrýlar bolǵan.
Qyrǵyzstanda 3 sáýirde COVID-19 koronavırýs ınfektsııasyn juqtyrǵan 9 jańa jaǵdaı tirkeldi. Osylaısha, elde COVID-19 vırýsyn juqtyrǵandar sany 125 adamǵa jetti. 5 naýqas aýrýhanadan saýyǵyp shyqty.
