Qyrǵyzstanda ákimshilik-aýmaqtyq qurylymdy reformalaý júrgiziledi
BІShKEK. QazAqparat - Qyrǵyzstan prezıdenti Sooronbaı Jeenbekov Qyrǵyzstanda ákimshilik-aýmaqtyq qurylymdy reformalaýdy kezeńmen júzege asyrý jol kartasyn jasap, bekitýdi usyndy, dep habarlaıdy QazAqparat menshikti tilshisi Qyrǵyzstan Respýblıkasy prezıdentiniń baspasóz qyzmetine silteme jasap.
S. Jeenbekov «Qyrǵyz Respýblıkasyndaǵy ákimshilik-aýmaqtyq reformalardy júrgizý boıynsha sharalar týraly» jarlyqqa qol qoıdy.
Atap aıtqanda, qujatta «qoldanylyp jatqan ákimshilik-aýmaqtyq reforma sharalary memlekettik bılikti ortalyqsyzdandyrýǵa, jergilikti ózin-ózi basqarý qyzmetin qarjylandyrýdyń tıimdi tetikterin qurýǵa, áleýmettik-ekonomıkalyq maqsattylyqty jáne óńirlerdi damytý máselelerin sheshýdi eskere otyryp, shalǵaıdaǵy ákimshilik-aýmaqtyq birlikterdi úlkeıtýge baǵyttalýy tıis» delingen.
Osyǵan baılanysty eldiń úkimetine 2018 jyldyń qyrkúıek aıynyń aıaǵyna deıin ákimshilik-aýmaqtyq reforma boıynsha jumys tobyn qurý usynyldy. 2018 jyldyń 31 jeltoqsanyna deıin jumys toby Qyrǵyz Respýblıkasynyń ákimshilik-aýmaqtyq qurylymyn reformalaýdy kezeń-kezeńimen júzege asyrý úshin jol kartasyn ázirlep, bekitýi kerek.
