Qyrǵyzstanda 29 jastaǵy kelinshek eń jas batyr ana atandy
ASTANA. QazAqparat - Ystyqkól oblysynda 29 jastaǵy Aıdana jetinshi sábıin dúnıege ákelip, kóp balaly batyr ana atandy, dep habarlaıdy Turmush .
Túp aýdanynyń turǵyny Aıdana Taqyrbasheva men onyń 38 jastaǵy kúıeýi Jyrǵalbek Orozov 31 qańtar kúni jetinshi sábıli boldy. Aýdan ákimi Sovetbek Ismaılov kópbalaly jas otbasyn quttyqtap, konvert syılady. «Qazirgi jastardyń ata-ana bolyp, kóp bala týýǵa asyǵatynyn kórip, qýanamyn. Óz zamandastaryńyzǵa jaqsy úlgi kórsetkenderińiz úshin alǵys aıtamyn», - dedi ákim.
Qazir úıde qalǵan balalarǵa naǵashy ájeleri bas-kóz bolýda. Otbasynyń kenjesi 1 jasta. Tuńǵysh ul Nurel - ata-anasynyń qolqanaty. Ekinshi synyp oqýshysy ózinen keıingi baýyrlaryna qarap, eń kishi inisine sút jylytyp beredi.
«Men memlekettik qyzmette istemeımin, ózimniń kishigirim sharýashylyǵym bar. Ózim úıde segizinshi bala bolǵanmyn. Toǵyz jyl buryn shańyraq kóterdik», - dedi Aıdananyń kúıeýi Jyrǵalbek.
Ázirge Aıdana perzenthanada jatyr, al Jyrǵalbek sıyrlardy saýyp, balalardyń kıimin jýyp, tamaǵyn ázirlep júr.
Úlgili jáne kópbalaly otbasyn jergilikti keńes depýtattary, Aral aýylynyń turǵyndary men týystary quttyqtap jatyr.
Jergilikti bılik organdary men depýtattar sábıge jańa arba satyp áperip, úıge kómir men qystyq otyn jetkizip berýdi qolǵa aldy.
Aıdana men Jyrǵalbektiń balalary:
- Nurel - 8 jasta, 2-synyp oqýshysy;
- egizder Elnaz jáne Gúlnaz - 6 jasta;
- Dılnaz - 5 jasta;
- Danııar - 4 jasta;
- Daıyr - 1 jasta
Jańa týǵan qyz balaǵa áli esim tańdalmaǵan.
Eske sala ketsek, elimizdegi eń jas kóp balaly ana Qyzylorda oblysynda tirkeldi. 27 jastaǵy Dınara Manatbekqyzy jeti balany dúnıege ákelip, Batyr ana atanǵan bolatyn. Ol jary Renat Ábdibaıulymen birge úsh ul, tórt qyz tárbıelep otyr.
