Qyrǵyzstanda 27 jastaǵy qyzdyń ólimi: Mılıtsııanyń 43 qyzmetkeri jaýapqa tartyldy
BІShKEK. Kabar - QazAqparat – Qyrǵyzstanda 27 jastaǵy qyzdy urlaý jáne óltirý isi boıynsha ishki ister organdarynyń 43 qyzmetkeri jaýapqa tartyldy, dep habarlaıdy QazAqparat «Kabar» agenttigine silteme jasap.
Qyrǵyzstan Іshki ister mınıstrliginiń baspasóz qyzmetinen málim etkendeı, mınıstrlik osy iske jaýapty tulǵalarǵa óz qyzmettik mindetterin tıisti oryndamaǵany úshin túbegeıli sharalar qoldanady.
Vedomstvo dereginshe, qaıǵyly oqıǵaǵa baılanysty Bishkek qalasy Pervomaı aýdandyq ishki ister bólimi, Bishkek qalasynyń jáne Shý oblysynyń ishki ister basqarlamalarynyń qyzmetkerlerine qatysty qyzmettik tekserý taǵaıyndalǵan.
«ІІM-niń Іshki tergeý qyzmeti bolǵan oqıǵa jáne mılıtsııa qyzmetkerleriniń, bólim bastyqtarynyń áreketteri boıynsha tolyq jáne obektıvti tekseris júrgizdi. Nátıjesinde olardyń qyzmettik áreketterine baǵa berilip, 2021 jyldyń 9 sáýirinde ІІM-niń buıryǵy shyqty», - dep jazady «Kabar».
Jalpy, atalǵan is boıynsha ishki ister organdarynyń 43 qyzmetkeri jazalandy. Jalpy, atalǵan is boıynsha ishki ister organdarynyń 43 qyzmetkeri jazalandy. Laýazymynan bosatylǵandar arasynda Bishkek qalalyq ishki ister basqarmasynyń bastyǵy B.Matmýsaev, onyń orynbasary E.Atantaev, Bishkek qalalyq ishki ister basqarmasy Tergeý qyzmetiniń bastyǵy N.Ýtemısov bar.
Eske salaıyq, 5 sáýir kúni 3 er adam 27 jastaǵy Aızada Qanatbekovany alyp qashty. Qyrǵyzstannyń QK-niń 175-baby (Adamdy nekege otyrǵyzý maqsatymen urlaý) boıynsha is qozǵaldy. 7 sáýirde Aızadanyń múrdesi Arashan jáne Chokmorov aýyldarynyń arasynda, «Honda» avtokóliginde tabyldy. Aldyn ala derek boıynsha, qyzdy urlaǵan azamat ony býyndyryp óltirgen. Artynsha óziniń moınyna pyshaq suǵyp, sýıtsıd jasaǵan.
8 sáýirde Bishkekte Qyrǵyzstannyń ІІM jáne Bishkek QІІB basshylarynyń otstavkaǵa ketýin talap etken mıtıng ótti.
Jaǵdaı boıynsha Qyrǵyzstan prezıdenti Sadyr Japarov málimdeme jasap, bul isti óz baqylaýyna aldy.
