Qyrǵyzstanda 2020 jyl tsıfrlandyrý jáne balalardy qoldaý jyly dep jarııalandy
NUR-SULTAN. QazAqparat - Qyrǵyzstan Prezıdenti Sooronbaı Jeenbekov 2020 jyldy Óńirlerdi damytý, eldi tsıfrlandyrý jáne balalardy qoldaý jyly dep jarııalady, dep habarlaıdy QazAqparat Kabar agenttigine siltememen.
Bul týraly Qyrǵyzstan prezıdenti jańajyldyq quttyqtaýynda aıtty.
«Eski jylda qol jetkizgenimizdiń barlyǵy - sizderdiń kún saıynǵy eńbekterińiz ben kúsh-jigerlerińizdiń nátıjesi. Qurmetti otandastar, sizderdiń qoldaýlaryńyz úshin alǵys bildiremin. Ótken jyldyń jaǵymdy ózgeristeri jańa jylda da jalǵasyn tabady. Sonymen qatar, balalarymyzǵa erekshe nazar aýdarylady. Kúsh-jigerimizdi biriktire otyryp, ár balanyń laıyqty ómirin qamtamasyz etetinimizge senimdimin. Osy maqsatta Jańa 2020 jyly «Óńirlerdi damytý, eldi tsıfrlandyrý jáne balalardy qoldaý jyly» dep jarııalaýdy uıǵardym. Balalarǵa qamqorlyq jasaý - bul ómirdegi eń ıgi is. Jańa jyl qutty bolsyn, qymbatty qyrǵyzstandyqtar», - dedi S. Jeenbekov.
