Qyrǵyzstanda 2 myńnan astam bala mektepke barmaı júr

BІShKEK. QazAqparat - Qyrǵyzstanda mektep tabaldyryǵyn attamaǵan balalar sany tómendedi, dep habarlaıdy Kabar agenttigi Qyrǵyzstannyń Bilim jáne ǵylym mınıstrligine silteme jasap.

Vedomstvonyń baspasóz qyzmetiniń málimetinshe, 2012 jyly 8329 bala jalpy bilim beretin mekemelerge barmaǵan. Al 2018 jyly atalmysh kórsetkish 2177 balaǵa deıin qysqardy.

«Jyl saıyn qańtar, mamyr jáne tamyz aılarynda mektep jasyndaǵy balalarǵa esep júrgiziledi. Tamyz aıyndaǵy esep boıynsha 140 myńnan astam bala tirkeldi. Sondaı-aq, ártúrli jastaǵy 2177 bala mektepte bilim almaıtyny anyqtaldy. Olardyń 1545-i oqý ordalaryna qaıtaryldy», -dedi mınıstrliktegiler.

Budan bólek, 2018 jylǵy sáýir-maýsym aralyǵynda mektep oqýshylaryn esepteý júıesin elektrondy formatqa kóshirý úshin mektep oqýshylarynyń maǵlumattary tsıfrlandyryldy (balalardyń elektrondyq tólqujaty).

Sondaı-aq, 2018 jylǵy 12-14 qyrkúıek aralyǵynda respýblıka aýmaǵynda Qyrǵyzstan Respýblıkasynyń ІІM-men birlesken «Sálem, mektep» profılaktıkalyq reıdtik sharasy uıymdastyryldy.

Shara barysynda mektepte bilim almaıtyn kámelet jasyna tolmaǵan 138 bala anyqtaldy. Olardyń 115-i oqýyn ary qaraı jalǵastyrý úshin jalpy bilim beretin mekemelerge qaıtaryldy.