Qyrǵyzstan úkimetine senimsizdik votýmy jarııalandy: Premer otstavkaǵa ketedi
ASTANA. QazAqparat - Qyrǵyz Respýblıkasynyń Jogorký Kenesh depýtattary el úkimetine senimsizdik votýmyn bildirdi. Osy sheshimge 101 depýtat daýys bergen, dep habarlaıdy «QazAqparat» HAA Kabar agenttigine silteme jasap.
Buryn «Respýblıka - Ata-Jýrt» fraktsııasynyń lıderi Jyrǵalbek Turysqulov tóraǵa Dastanbek Jumabekovten parlament otyrysynyń kún tártibine úkimetke senimsizdik votýmyn bildirý týraly máseleni engizýdi suraǵan bolatyn. Ony «Ata Meken» fraktsııasynyń basshysy Almambet Shykmamatov ta qoldady.
Sodan keıin Konstıtýtsııalyq zańnama, memlekettik qurylys, sot-quqyq máseleleri jáne Jogorký Keneshtiń Reglamenti jónindegi komıtet 15 mınýttyq otyrys ótkizdi jáne Mınıstrler kabınetine senimsizdik votýmyn bildirý týraly máseleni parlamenttiń qaraýyna engizý týraly sheshim qabyldady.
Keıin depýtattardyń daýys berýi boıynsha, Jogorký Kenesh úkimetke senimsizdik votýmyn bildirý týraly qaýly qabyldady, oǵan 101 depýtat daýys bergen.
Eske sala keteıik, «Respýblıka - Ata Jýrt», «Ata Meken» jáne «Onýgýý-Progress» fraktsııalary úkimet usynǵan 2017 jyldyń esebine qanaǵattanbaǵan bolatyn. Buǵan deıin Qyrǵyzstannyń sotsıal-demokratııalyq partııasy men «Qyrǵyzstan» partııasy Mınıstrler kabınetiniń esebin qabyldaǵan.
Sapar Isaqovtyń úkimeti 2017 jylǵy 26 tamyzda bekitilgen.
