Qyrǵyzstan ýaqytsha úkimetiniń basshysy UQShU Bas hatshysymen kelissózder júrgizdi
BІShKEK. Maýsymnyń 25-i. QazAqparat /Evgenıı Novıkov/ - Qyrǵyzstan ýaqytsha úkimetiniń basshysy Roza Otynbaeva búgin Ujymdyq qaýipsizdik sharty uıymynyń Bas hatshysy Nıkolaı Bordıýjamen kezdesti.
Kelissózder qorytyndysy boıynsha baspasóz máslıhatynda R.Otynbaeva respýblıkanyń ońtústigindegi jaǵdaıdy turaqtandyrýda UQShU múshe-memleketteriniń Qyrǵyzstanǵa járdemdesý jónindegi kúsh-jigerinde qosymsha sharalardy júzege asyrýmen baılanysty máseleler qaralǵanyn atap ótti.
N.Bordıýja óz kezeginde UQShU qatysýshylary Qyrǵyzstannyń quqyqtyq, kúsh-qýat qurylymdaryna ońtústik oblystarda tártipti jónge salýda, janjaldardy, quqyqqa qarsy áreketterdi bastaýshylardy, aıdap salýshylardy jáne uıymdastyrýshylardy aýyzdyqtaýǵa járdemdesý jónindegi sheshimdi qoldaıtynyn aıtty. «Sondaı-aq ártúrli ósek-aıań men arandatýshylyqty boldyrmaý maqsatynda aqparat aǵynymen jumys júrgiziledi», - dedi ol.
Onyń aıtýynsha, Osh jáne Jalalabad oblystary aýmaǵynda ornalastyrylatyn ýaqytsha jedel top qurylady jáne eldiń kúsh-qýat qurylymdarymen ózara is-qımyl jasap, olarǵa respýblıkanyń ońtústigindegi turaqtylyqty qamtamasyz etýde týyndaǵan problemalardy sheshýge járdemdesetin bolady.
Jýrnalısterdiń suraqtaryna jaýap qaıtara kelip, N.Bordıýja, atap aıtqanda, UQShU-ǵa qajetti rásimderdi ótkizý úshin birshama ýaqyt qajet bolǵanyn aıtty jáne odan keıin Qyrǵyzstannyń quqyq qorǵaý jáne kúsh-qýat qurylymdaryna kómektesý jáne járdemdesý jóninde sheshim qabyldanǵanyn atap ótti.
