Qyrǵyzstan: Túrmeden qashqan asa qaýipti qylmyskerlerdiń beseýi ustaldy
ASTANA. QazAqparat - Túrmeden qashqan qylmyskerlerdi ustaý kezinde mılıtsııa qyzmetkerleri tabel qarýyn qoldandy, dep habarlady dúısenbi kúni Qyrǵyz Respýblıkasynyń ІІM-nen.
Buryn habarlanǵandaı, SIZO-50 bas bostandyǵynan aıyrý ornynan qashqan 9 qylmyskerdiń beseýin izin sýytpaı ustaý múmkin boldy.
Shamamen saǵat 1-de Shý oblysyndaǵy QІІB JPQ qyzmetkerleri Lenınskıı aýylynda tuspaldaý boıynsha berilgen kólikke uqsas Toyota Estima markaly kóligin baıqap, ony toqtatpaq boldy.
Kólik júrgizýshisi JPQ ınspektorlarynyń toqtaý talaptaryna baǵynbady.
Jol-patrýldik qyzmetkerleri eskertý retinde áýege eki ret oq atqan. Biraq áreketteri elenbegen soń, JPQ qyzmetkerlerine tabeldik tapanshadan kólik dóńgelekterinen atýǵa týra keldi.
Mashınanyń ishinde shamamen 9 adam otyrǵan, olardyń birnesheýi, sonyń ishinde júrgizýshisi jan-jaqqa qashyp ketti, kúdikti bes azamatty oqıǵa ornynda ustaý múmkin boldy. Kólik salonynyń ishinde túrmeden qashý kezinde tártip saqshysynyń oǵyna ushyraǵan jaraqattanǵan sottalýshy jatqan. Tekserý kezinde ustalǵan tulǵalardan qadaıtyn-kesetin zattar anyqtalyp, alyndy.
Buryn habarlanǵandaı, 12 qazanǵa qaraǵan túni №50 túzeý mekemesinen toǵyz sottalýshy qashyp ketken. Qashý kezinde olar túrmeniń úsh qyzmetkerin qylqyndyryp óltirip, bireýiniń basyn birneshe ret balǵamen soqqylaǵan.
Toǵyz qashqynnyń beseýi ustaldy, olardyń arasyndaǵy jaraqaty bar bireýi aýrýhanaǵa jetkizildi, dep jazady KırTAG.
