Qyrǵyzstan turǵyndary qoldaryndaǵy qarýdyń jartysyn da tapsyrǵan joq
ASTANA. 17 qańtar. QazAqparat - Búgingi kúnderi Qyrǵyzstan qarýly kúshteriniń kómegimen 2010 jyldyń sáýir men maýsym aılarynda ótken tártipsizdikterge qatysýshylardan tek 40 paıyzynan qarý-jaraq alyndy.
Bul týraly respýblıkanyń ІІM basshysy Zarylbek Rysalıev málim etti, dep jazady «Lenta.rý» portaly «24.kg» silteme jasap. Qalǵan qarý-jaraq onyń aıtýynsha, áli kúnge deıin turǵyndardyń qolynda qalyp otyr.
Mınıstr basyp alynǵan qarýdyń dál sanyn ataı almady. Onyń aıtýynsha, turǵyndardan qarýdyń «myńnan asa birlikteri» tabyldy. Buǵan deıin derekkózderi birneshe myń qarý barlyǵyn atap ótken bolatyn. Quqyq qorǵaýshy Tóleqan Ismaılova (sol oqıǵalardy zertteý komıssııasynyń tóraıymy) sáýirde ótken oqıǵaǵa qatysýshylardyń qolynda 2 myńǵa jýyq qarý-jaraq birlikteri boldy, degendi aıtady.
Keıbir derekter boıynsha, tártipsizdikke qatysýshylardyń qolynda tapanshalar, avtomattar, besatarlar, tipti granata atqyshtar da bolǵan. Qyǵyzstan ІІM azamattardy qarýdy óz erikterimen tapsyrýǵa shaqyrdy. Ol úshin arnaıy syıaqy da taǵaıyndaldy. Úkimet avtomat pen mergendik besatardy tapsyrǵandar úshin 4,8 myń som (júz dollar) tóleýge ýáde berdi.
Eldiń ońtústiginde bolǵan sáýirdegi jappaı tártipsizdik kezinde oǵan qatysýshylar qarýdy qarýly kúshter qyzmetkerlerinen tartyp aldy degen kúdik basym. Ákimshilik ǵımarattardy (mılıtsııa bólimshelerin) basyp alǵandar sol jerden qarý urlaǵan.
Sáýir tártipsizdigi kezinde qoldanylǵan tapanshalar men avtomattar týraly keıin Qyrǵyzstan bılik ókilderi «basyp alyndy» degenniń ornyna «joǵaldy» degen tirkesti qoldandy.
