Qyrǵyzstan SІM shekara qaqtyǵysyna baılanysty Tájikstanǵa narazylyq notasyn ázirledi

BІShKEK. 12 qańtar. QazAqparat - Senbi kúni Bishkekte shuǵyl otyrys jınalyp, Qyrǵyzstannyń premer-mınıstri Jantoro Satybaldıev syrtqy ister mınıstrligine qyrǵyz-tájik shekarasyndaǵy atysqa baılanysty Tájikstan tarapyna narazylyq notasyn ázirleýdi tapsyrdy.

Oǵan qosa, Qyrǵyz Respýblıkasynyń premer-mınıstri Memlekettik shekara qyzmeti men qarýly kúshter organdaryna shekara kúzeti men qoǵamdyq tártiptiń kúsheıtilgen rejımine kóshýdi tapsyrdy. Batken oblysynyń jergilikti bıligine óńir turǵyndaryna qoǵamdyq tártipti saqtaýǵa jáne qandaı da bir qaqtyǵystarǵa jol bermeýge baǵyttalǵan túsindirý jumystaryn keńinen júrgizýdi tapsyrdy. Eske sala keteıik, 11 qańtarda Batken oblysynyń Batken aýdany Aqsaı aýylynyń mańynda bas sý bólý aýdanynda Tájikstan shekara áskeriniń arnaıy jasaq toby men Qyrǵyzstan MShQ áskerı qyzmetshileri arasynda qarýly qaqtyǵys boldy. Munyń arty bir saǵatqa sozylǵan atysqa ulasty. Atys saldarynan qyrǵyz tarapynan bes adam, tájik tarapynan alty adam zardap shekti.