Qyrǵyzstan Prezıdentiniń Dúnıejúzilik bank jáne Halyqaralyq valıýta qorynyń basshylyǵymen kezdesýinde yntymaqtastyqty keńeıtý máseleleri talqylandy
BІShKEK. 28 qańtar. QazAqparat /Arnur Rahymbekov/ - Bishkekte Qyrǵyz Respýblıkasynyń Prezıdenti Roza Otynbaeva Dúnıejúzilik banktiń atqarýshy dırektory Mıshel Mordasınımen jáne Halyqaralyq valıýta qorynyń atqarýshy dırektory Rene Vebermen kezdesti.
Qyrǵyz tarapynan bul kezdesýge QR Prezıdenti Apparatynyń syrtqy baılanystar jáne hattama bóliminiń meńgerýshisi Erınes Otorbaev pen eldiń qarjy mınıstri Chorobek Imashev qatysty.
Júzdesý barysynda Qyrǵyzstan basshysy 2010 jyly 27 shildede Bishkekte ótken «Qyrǵyz Respýblıkasyna tótenshe kómek» donorlar konferentsııasynyń jumysyna belsendi atsalysqany úshin Dúnıejúzilik bank pen Halyqaralyq valıýta qoryna alǵys bildirdi.
R.Otynbaeva sondaı-aq eldiń áleýmettik-ekonomıkalyq damýynyń negizgi qorytyndylary týraly, ótken jyly elde bolǵan mańyzdy oqıǵalar jaıly áńgimelep berdi.
Dúnıejúzilik banktiń atqarýshy dırektory óz kezeginde, aǵymdaǵy yntymaqtastyq máselelerin talqylaý úshin Qyrǵyzstanǵa Banktiń Taıaý Shyǵys jáne Ortalyq Azııa elderi departamenti mıssııasynyń saparmen kele jatqanyn jetkizdi.
Kezdesý barysynda yntymaqtastyqty nyǵaıtý men keńeıtýdiń basqa da ózekti máseleleri talqylandy.
