Qyrǵyzstan Prezıdenti ulttyq arnaıy qyzmet mamandarynan basqa eldiń barlaýshylarymen belsendi ózara is-qımyl ornatýdy tapsyrdy
BІShKEK. 4 aqpan. QazAqparat /Arnur Rahymbekov/ - Bishkekte el prezıdenti Roza Otynbaevanyń qatysýymen Qyrǵyzstannyń Memlekettik ulttyq qaýipsizdik komıtetiniń alqa otyrysy bolyp ótti.
Otyrysqa sondaı-aq respýblıkalyq quqyq qorǵaý organdarynyń jetekshileri de qatysty. Qyrǵyzstan basshysy Memlekettik ulttyq qaýipsizdik komıtetiniń aldaǵy jylǵy negizgi mindetteri aıqyndalǵan sóz sóıledi.
R.Otynbaeva búgingi tańda el qaýipsizdigi eń ózekti máselelerdiń biri bolyp tabylady dep atap ótti. «Eń qıyn kezeńder artta qaldy. Eldiń ońtústiginde bolǵan qaıǵyly oqıǵalar barlyǵymyzdy dúr silkindirdi. Bul oqıǵalarda sizder el tutastyǵyn, halyq birligin saqtadyńyzdar», - dedi Qyrǵyzstan prezıdenti.
Qyrǵyzstan Memlekettik ulttyq qaýipsizdik komıteti qyzmetiniń basty baǵyttary retinde el prezıdenti uıymdasqan qylmysqa qarsy kúresti atap kórsetti. Maýsym aıynda qantógis bolǵan eldiń ońtústigindegi turǵyndar áli kúnge deıin jaǵymsyz zardaptardy kórip keledi.
Qyrǵyzstan basshysy sondaı-aq alǵashqy orynda lańkestik turatyn Qyrǵyzstannyń syrtqy qaýipsizdik faktorlaryna toqtaldy. El prezıdenti basqa elderdiń barlaýshylarymen belsendi túrde yntymaqtastyq ornatýdy tapsyrdy, ol úshin Memlekettik ulttyq qaýipsizdik komıtetiniń qyzmetkerleri shet tilderdi meńgerýi qajet. «Qyrǵyzstan-Tájikstan shekarasyn biz kózimizdiń qarashyǵyndaı kúzetýimiz qajet. Osy baǵytta biz qajetti qarjyny aıamaýymyz kerek», - dep atap ótti Qyrǵyzstan Prezıdenti.
