Qyrǵyzstan Prezıdenti Úkimettiń otstavkaǵa ketýi týraly Jarlyqqa qol qoıdy
BІShKEK. QazAqparat - Búgin, 2014 jyldyń 19 naýryzy Qyrǵyz Respýblıkasynyń Prezıdenti Almazbek Atambaev Qyrǵyz Respýblıkasynyń Prezıdenti apparatynyń jetekshisi Danııar Narymbaevty qabyldady. Ol Memleket basshysyna «Yrys aldy yntymaq» parlamenttik kópshiligi dárejesiniń joǵalǵany týraly koalıtsııanyń kóshbasshysy Felıks Kýlovtyń resmı hatyn tapsyrdy.
«Yrys aldy yntymaq» parlamenttik kópshiliginiń koalıtsııasy quramynan «Ata Meken» fraktsııasynyń shyǵýyna baılanysty qyzmetin toqtatty, dep habarlandy Qyrǵyzstan basshysynyń saıtynda. Prezıdent Almazbek Atambaev Qyrǵyz Respýblıkasynyń Konstıtýtsııasy men QR «Qyrǵyz Respýblıkasynyń Úkimeti týraly» konstıtýtsııalyq zańyna sáıkes, Qyrǵyzstan Respýblıkasy Úkimetiniń otstavkǵa ketýi jóninde Jarlyqqa qol qoıdy. Jarlyqqa sáıkes, Qyrǵyz Respýblıkasynyń Joǵary Keńesiniń fraktsııalary arasyndaǵy kelisimnen keıin qurylǵan Qyrǵyz Respýblıkasynyń Úkimeti 2012 jyldyń 3 qyrkúıeginen otstavkaǵa ketken dep sanalady. Jarlyqqa sáıkes, Premer-Mınıstr, birinshi vıtse-Premer-Mınıstr, Qyrǵyz Respýblıkasy Úkimetiniń músheleri men vıtse-Premer-Mınıstrleri Qyrǵyz Respýblıkasy Úkimetiniń jańa quramy qurylǵansha qyzmetteri men mindetterin atqara beredi. Jarlyq oǵan qol qoıylǵan sátten bastap kúshine enedi.
