Qyrǵyzstan Prezıdenti túrik dárigerleriniń baqylaýynda

ASTANA. QazAqparat - Qyrǵyzstan Prezıdenti Almazbek Atambaev Atatúrik áýejaıynda ózin jaısyz sezingennen keıin saýyqtyrýdan ótýde, AQSh-qa saparyn keıinge qaldyrýǵa májbúr. Bul týraly Túrkııanyń Anadolý agenttigi habarlady.

Belgili bolǵandaı, Atambaev mingen ushaq túnde Izmırdiń Andnan Menderes atyndaǵy halyqaralyq áýejaıyna qondy. Qyrǵyzstan Prezıdentiniń densaýlyǵy kúrt nasharlap, ol aýrýhanaǵa jetkizilgen.

Qazir Almazbek Atambaev Cheshme qonaqúıleriniń birinde. Onyń densaýlyǵy dárigerlerdiń jiti baqylaýynda. Ǵımaratta jedel járdem kóligi kezekshilik etýde. Qyrǵyzstan Prezıdenti qyrkúıek sońyna deıin Túrkııada tyńǵylyqty medıtsınalyq tekserýden ótedi.

Eske sala ketsek, keshe BUU Bas Assambleıasynyń 71-shi sessııasyna qatysý úshin Bishkekten ushyp shyǵyp Nıý-Iorkke bet alǵan jolda Qyrǵyz Respýblıkasynyń prezıdenti Almazbek Atambaev júregi aýyrǵandyqtan saparyn toqtatqan bolatyn.